May 10, 2024; Phawngpui National Park chu May ni 1, 2024 atanga November ni 1, 2024 thleng khar a ni dawn.

Deputy Conservator of Forest, Chhimtuipui Wildlife Division, Lawngtlai in office order a chhuah a tarlan a nih danin, fur kan lo hnaih tawh avang leh nungchate zalen leh him zawka an inthlahpun theih nan Phawngpui National Park chu May ni 1, 2024 atanga November ni 1, 2024 thleng khar a ni.

Phawngpui, saptawng a ‘Blue mountain’ an tih hi, Mizoram a tlang sang ber a ni a. A tlangsan zawng chu metre 2,157 niin, Mizoram chhimchhak lam Myanmar border, Lawngtlai dist. chhung a awm a ni.

He tlang thlang lam ah hian, a chanve dawna kual deuh ruihin, kham a awm a, chu chu ‘Thlazuang kham’ an ti. He tlang hmawr hriam leh ruam thuk zet hi, helai a ramsa cheng ‘Saza’ te tan chuan, an ‘Natural home’ a ni. He tlang bulthut zauzawng hi km 2 zet a ni a. He tlang hming hi, lai tawng atang a lak a ni a. ‘Phong’ tih chu phul hmun (grassland) emaw, phaitual hnim tona hmun (meadow) tihna niin, ‘pui’ tih chu thumal tawpa thu bei (suffix) niin, ropui (great) tihna a ni. He hming an phuahchhan ni a lang chu, he tlang hmun tam zawk hi, phul chi hrang hrangin a khuh deuh vek vang a ni. 

Phawngpui tlang bulthut, a tlang pan chhohna pui ber ah ‘Farpak’ (far thinghmun) an tih a awm a ni. Kum 1992 khan Phawngpui tlang hi, ‘Phawngpui National Park’ tiin, protected area a puan a ni a. India ram a National park pakhat, Mizoram chhunga awm a nih rualin, Mizoram ta a ni. Mizoram sawrkar chuan, November atang a April thla inkar chhung chauh hian, ecofriendly bik atan helai hmun hi tlawh a phal thin.