Plastic recycling-ah ke penna hlawhtling tura ngaih

Aizawl: Public Health Engineering department chuan plastic tawn-khawmna khawl 'plastic baling machine' 6 an lei tawh a, Aibawk ah heng khawl zinga pakhat hi hman mek a ni.

PHE hotute hnen atanga Zalen thudawn danin plastic baling machine hi Mizorama RD Block zawng zawngah dah tum a ni a, a bultan nan khawl 6 lei phawt a ni a, pakhat hi Aibawk RD Block ah dah a niin hman mek a ni a, a dang hi Zuangtui a PHE godown ah dah hrih an ni.

PHE thawktute sawi danin he khawl hian plastic chhia te chu ‘2nd hand bale’ tawnkhawm angin a tawnkhawm a, kg 25 vel te tea tawn khawmin recycling machine awmna hnai Silchar leh Kolkata ah te hralh leh tum a ni.

PHE chuan hetiang bawlhhlawh paihna dan thar hman nan leh en-chhinna atan khaw 9 te chu model village atan thlang chhuakin bawlhhlawh thliarhran dan te zirtirin khawtlang mipuite telna Watsan committee din a ni ang a, an kutah bawlh-hlawh khawn leh hralh chungchang hi dah tum nia thudawn a ni.

Baling machine chu engnge ?
Thirchhe nem deuh, plastic leh thil dangte hi recycle dawn chuan muk thei ang bera nawr/ tawn khawm a ngai thin a, hei hian sum senso nasa takin a ti tlahniam a ni. PHE lei hi chu plastic um nawrkhawmna chi a niin plastic chhia hralh leh duh tan pawh tlema man man zawka hrlah theih tura ngaih a ni.