Aizawl June 16, 2024 : Tun hnai tui lianin a tihchhiat, Aizawl khawpui tui pump-na khawl chu Guwahati-ah siamtir mek a ni a, engtikah nge an siam zawh ang tih hriat theih mai a la ni lo.

ZALEN-in PHE thawktute hnen atanga thu a dawn danin Greater Aizawl Water Supply Scheme (GAWSS) phase II atang chuan dan pangngaiin tui pump leh theih a ni tawh a. Hetih lai hian tui lianin a tih chhiat, GAWSS phase I khawl erawh siam that turin Guwahati-ah thawn a ni a, June thla chhung hian an siam tha hman dawn nge dawn lo a la hriat loh a; mahse, diesel hmangin tui pump a ni a. GAWSS phase III atang chuan tui hi pump theih a la ni lo thung tih an sawi.

PHE hotute chuan May 28, 2024 atang khan tui chu an pump tan leh tawh a; mahse, ruah sur changin Tlawng tui hi a nut nasat thin avangin duh angin tui hi an pump thei lo a. Hei vang hian duh angin tui hnianghnarin an la sem thei lo niin an sawi bawk.