ZALEN May 9, 2025 : PHE Minister Prof. Lalnilawma chuan Aizawl khawpui veng hrang hranga tuisem ni a tui put, tui liam leh mahni tui dahkhawlna a khah tawh hnua pawha tui tiliam thin chungchang chu a enchhin nan Khatla South tlawhin PHE Department a thawktu – Lalrinzuala Ralte, SE Aizawl WATSAN Circle ; Lalzuimawii, EE AWDD, Aizawl South leh Khalta South Local Council Chairman P L Liandinga te nen tui sem dan leh tui liam te an en ho a ni.

Prof. Lalnilawma chuan, "Sawrkarin sum tam tak sengin mipuite hnenah tui thianglim a sem thin a, mipuiin tui man hi pe mah se, khua leh tui tha angin tih tur mipuiin kan nei a, tui ren nachang kan hriat theuh hi a ni. Tui leak (put) leh tui liam chu Department-in a ngaihmawh viau avangin tui put report-na App te pawh siamin hei hi tangkai taka chhawr mek a ni."

 "Mipui tam zawkin tui ren leh hlutna nachang kan hre bel tawh hle, mahse thenkhat erawh an tui dahkhawlna a khah vek tawh hna pawha a bill kan chawi alawm tiin connection off lovin kawng leh kawr ah te an luan tir thin a, hetiang hi kan bansan a hun tawh hle a ni a," ti. Tui ti liam fo thin te hremna dan siam pawh la ngaihtuah a tul thu a sawi lang bawk.

PHE Minister chuan mipui te chu tuisem niah an tui dahkhawlna a khah tawh hnu in connection off thin tur te, tui pipe leak a awmin rang taka App hmang emaw PHE thawktu emaw te hnenah hriattir turin leh mahni connection line te a leak em tih te chik leh vil thin turin a ngen a a ni.