China chuan United States-in Hong Kong-a Chinese thuneitute a hrek chhan let nan US mi pawimawh leh pawl eng emaw zat a hrek ve.

An hrek zingah hian US commerce secretary hlui, Wilbur Ross pawh a tel.

Hetianga ram pahnih inkara inhrekna kalpui hi US Deputy Secretary of State Wendy Sherman-an China a tlawh hma lawka tih a ni.

US hian Hong Kong-a Chinese thuneitu sang eng emaw zat chu he khawpuia venhimna thil tia mipui laka an chet danah an inrawlh avangin a hrek.

Washington hian Hong Kong-a an ram mi sumdawnga awmte dinhmun pawh a derthawng telh telh tih a sawi bawk.

China hian nikum khan Hong Kong-ah hian National Security Law hmang tharin hei hi he khawpuia cheng, mipui rorelna duhtute chuan duh lohna nasa takin an lantir a. An dan thar hnuaiah hian ram (China) pawisawi zawnga che leh ram dang puihna late chu dam chhung lung in tang hial tura hrem theih an ni.

Chinese foreign ministry chuan US-in a mi pawimawhte a hrek hi ‘behchhan nei lova Hong Kong-a sumdawnna kal vel tihchhiat tumna’ tiin a sawi a, US chet dan chu ‘khawvel dan kalh a nih bakah ram leh ram inkungkaihna kal pangngai bawhchhiatna’ niin a sawi bawk.

A chhan let nan hian US mi leh pawl pasarih chu a hrek zui ve a, an zingah hian Ross pawh a tel.

President Donald Trump-a hun laia commerce secretary a nih lai khan Ross-a hian American firm-ten phalna nei hmasa lova Chinese sumdawng an thawhpui theih loh tur list-a awm tam taka tipungin heng zingah hian Chinese telecom giant, Huawei leh ZTE pawh an tel.

China-in a hrek zingah hian Sophie Richardson, Human Rights Watch-a China director; Carolyn Bartholomew, US-China Economic & Security Review Commission-a chairman leh International Republican Institute-a mi, Adam King pawh a tel.

White House press secretary Jen Psaki chuan China-in a chhan let dan chu US chuan mak a tih thu a sawi.

“An chet dan hi Beijing-in mi mal, company leh mipui huap pawl laka politics thila hma a lak duh dan entirna a ni,” a ti.