Paul Pogba-a lu mettu Ahmed AlsanawI chuan midfielder hi a club hlui Juventus lamah a let dawn nia ngaih theih turin Instagram lamah a post. A contract neih lai chu thla thar khian a tawp mai dawn a, tun thlengin pawhsei a la ni lo bawk. Frenchman hian a duh chuan free agent angin tun nipui transfer chhung hian Old Trafford a chhuahsan thei. 

Tlang rin dan chuan France international hi Serie A lamah a luh leh mai rin a ni mek. Tunah hian Juventus lam chuan kum khata £10million hlawh turin kum thum daih contract an zawrh mek nia awi a ni. Italian club hian an sawmna chhanga, PSG lam beiseina erawh hnawla a an lama a kal ngei pawh an ring hle niin report a ni. 

Kum 29 mi Pogba hian a hairstyle thar chu a follower te hmuh theih turin Instagram lamah a tarlang a, caption-ah "Tun hi eng hun nge a ni tih in hria e" tih a ziak bawk. He a thlalak leh a thu post hi a lu mettu chuan comment-in '#pogback' a ti a, Juventus jersey rawng emojis dum leh var a hmang bawk. 

Hetih lai hian PSG lam pawh Pogba lak tumin an la beidawng duh bik lova, Pogba hian a ram club ngeiah let turin an duh hle a, mahse boruak thlirin an chang dawn lo a ang mah rih zawk. Sportsmail chuan tun thla tir khan Manchester City lam pawhin, an hmelma United atanga man lova neih theih Pogba chu lak luh an lo tum ve ngei niin a sawi. 

Juventus lama a khelh lai khan a chetha hle a, a khelh chhung khan season li chhungin Serie A title an chawi vek thei a, game 178 a khelhah goal 34 a thun bakah assist 40 a nei a ni. A lar vanglai hian United chuan Old Trafford lama khel turin club record fee £89million zetin kum 2016 khan Pogba hi an lei chhuak a ni.