November 22, 2022; November ni 21, Thawhtan zan khan Vairengte Police (Kolasib District) Check Gate duty te chuan kuhva ro, Kg 3500 vel chu Assam lam pan Truck ke 16 nei chi atangin an man. Mizoram police chuan thuchhuah siamin, dan lova kuhva rah phurh titawp vek tur hian theihtawp kan chhuah zel dawn tih an tarlang.

Mizoram police thuchhuah tarlan danin, Kolasib District Magistrate-in Kolasib district chhunga dan phalloh kuhva rah phurh luh leh district kaltlanga phurh khapna order (u/s 144 CrPC) a tihchhuah mek laiin, nizan khan Vairengte Police (Kolasib District) Check Gate duty te chuan kuhva ro, Kg 3500 vel, Assam lam pan Truck (Ke 16 nei chi) pakhat in dan bawhchhia a a phurh, Sahanul Abedin Talukdar (29) s/o Abdul Manan Talukdar, Brahmangram, Kalain, Cachar, Assam in a khalh chu an man. Heng kuhva ro te hi bungraw phurhna compartment a bika siam ah thuhruk a ni. Vairengte PS-ah thubuai, 188 IPC hnuaiah ziah luh niin, a kaihhnawih dangte chhui mek a ni.

November ni 18 zinga Bairabi Police (Kolasib District) Check gate duty ten dan lova phurh kuhva ro bag 33 (Kg 1980) an man chhui zuina leh mi man driver Jasim Uddin Laskar (28) thu zawhfiahna kal zelah, heng kuhva rah hring leh ro te hi Buhchangphai (Vairengte leh Bairabi inkar), Kolasib atanga phurh niin, kuhva rah neitu - Choudhury Abdula Mamun (36) s/o Monir Uddin Choudhury leh Bilal Ahmed Laskar (30) s/o Moin Uddin Laskar, Sahabad, Katlichera, Hailakandi, Assam te pawh hriat chhuaha man an ni. Mi man te hi judicial custody tura Court a thawn an ni tawh.

Mizoram police chuan hetiang dan lova kuhva rah phur hria chuan mahni kuta dan ken kawh tum mai lovin, police leh thuneitute hrilh hre vat turin an ngen tih thuchhuah siamin an tarlang.