ZALEN April 22, 2025: Vawiin chawhma dar 10:30 khan Lunglei police station-a cyber cell te hmalaknaa mobile phone bo leh ruk CEIR portal hmang a hmuh let mobile phone 15; Rs.2,55,696/- man hu chu a neitu dik takte hnena hlan letna hun hman a ni.

He hun hi K. Beihmotaosa MPS, Addl, S.P Lunglei leh Lalmawizuala MPS, SDPO Tlabung, Officer-in- Charge, Lunglei police station leh officer dangte’n an hmanpui a, mobile phone neitute an tel bawk.

K. Beihmotaosa chuan Lunglei police station-a cyber cell te hnenah lawmthu sawiin, mobile phone tibo report awm tawh phawt chu a tam thei ang ber theihtawpin chhuichhuah sak zel an tum tih a sawi a. He hlawhtlinna hi Central Equipment Identity Register (CEIR) portal awmze nei taka kan hman tangkai vang a ni, a ti.

Vawiina Mobile Phone hmuhlet te hi January atanga March thla 2025 chhunga chhui chhuahte an ni.

Lunglei police te chuan mobile phone bo leh ruk te hi ngawrh takin technology hmanga chhuiin vawiin ni thleng hian mi 130 te mobile phone hi hmuhlet sak tawhin a neitute hnenah hian hlan let vek a ni tawh a; hemi kaihhnawiha diklo taka lo leitute pawh case siamsak an ni bawk.

#ZalenNews