ZALEN April 13, 2025 : Mizoram police-in September, 2023 leh December, 2024 inkar chhung khan pawikhawihna chungchangah mi 3,210 man an nei a, chung zingah chuan thalai kum 18 atanga kum 40 inkar an tam ber.

Mizoram police tar lan danin September, 2023 leh December, 2024 inkara pawikhawihna hrang hrang thubuai an ziah luh zingah rukruk thubuai an tam ber a, thubuai ziah luh 42% zet a tling.

Thubuai ziah luh 16% chu Drugs & Psychotropic Substances Act (NDPS) hnuaia ziah luh a ni a, Mizoram Liquor Prohibition (MLP) Act hnuaia thubuai ziah luh 14% a tling bawk.

Police-ten pawikhawihna hrang hrang thubuai an neiha an mi man 3,210 zinga zaa 80 (80%) zette chu thalai, kum 18 atanga kum 40 inkar an ni a. Thubuai siamsak zawng zawng zinga 50% chu kum 18 atanga kum 30 inkar an ni a, chung zingah chuan hmeichhia 12.7% an tel.

Hemi hun chhunga police-te man zawng zawng zinga 96%-te chu India khua leh tui an ni a, zaa pali chu Myanmar atanga kal an ni.

Assam mi leh sa 158 man awmin chu chu zaa panga a tling a, Manipur mi 44 man an awm bawk a, Tripura mi 24 man an awm bawk.