Aizawl December 22, 2023: Vawiin khan Chief Minister Lalduhoma chuan a bial chhung khua Thenzawla Police Training School atanga 69th Batch Constable leh 4th Batch Head Constable (Operator) te Passing Out Parade programme chu khuallian niin a hmanpui a, parade contingent te a endik zawha thu a sawinaah, Police te hmangin mi tam tak nunna, an tisa leh thlarau thlenga venhim sak an tum tih a sawi.

Chief Minister chuan, "Police ka lo ni ve tawh thin a, in dinhmun tam tak hi ka hriatthiampui che u a ni. Police te hi in discipline a tha tur a ni a. Kum tin maia chawh ruala mi 100 chuang kan thi ziah thin hi mut mawh hnar mawhah kan neih a tul. Ka chhinchiah sual loh chuan tun hnai kum 7 chhung hian Battalion khat vel zet, mi 861 lai kan thi tling a, a rapthlak lutuk a ni. Police te kan zavaia kan tan tlan ka duh a, kan hriselna kan ngaih pawimawh a tul tak meuh a ni," a ti.

Lalduhoma chuan Politics a luh hnuah pawh Police ten an duhsak hle thin tih a hriat thu tarlangin, lawmthu a sawi a. Hmasawn zel nana an thil mamawh hrang hrang te pawh a theih chin chinah sawrkarin a ngaihtuah sak tur thu a hrilh a ni. Chief Minister hian hlim leh hahdam taka Christmas leh Kumthar an hman theih nan pass tharte hi January ni 2, 2024 thleng chawlh (leave) a pe a ni.

 Passing Out Parade nei te hi 69th Batch RC & 4th Batch HC (Opr) Basic Training te an ni a. Anni hi Compassionate Ground-a lak/recruit an ni. Dt.16.1.2023-ah Basic Training turin PTS-ah an lut a. A tirah chuan mi 284 in training hi an tan a, an zinga mi 13 te chu chhan hrang hrang avangin training chhunzawm thei lovin an awm a, vawiina POP thei hi mi 271 niin an zinga 116 hi hmeichhia an ni.