2022-23 Premier League season chu zirtawp zan zanlai khan Crystal Palace leh Arsenal ten Selhurst Park-ah bul an lo tan tawh a, nizan lamah match 6 an khel tawh bawk. Club thahnem tak chuan season thar tha zawka an khelh theihna turin player thar an la lut nual tawh a, club tam tak chu bazar tumin an la inkau mek bawk.  

Premier League club te chuan player te inbuatsaih nan leh fitness level a tlak hniam loh nan pre-season ah match eng emaw zat an khel a, club tam zawkin player thar an nei bawk nen, manager te pawhin an player thar te enchhin nan pre-season hi an hmang tangkai hlein a rinawm. 

Pre-season chhunga player chetha goal 5 leh a chunglam thun mi pathum i han tarlang teh ang. 

Darwin Nunez- 5 goal
Darwin Nunez hi 2022 summer transfer window chhunga Premier League player titi siamtu ber pakhat a ni a, Liverpool zawmin pre-season lamah pawh a chetha nghal. Benfica atangin €100 million (add-ons telin) zetin an la lut a, Liverpool player man to ber record a ni nghe nghe. 

Uruguayan striker hian German club, RB Leipzig lakah goal li zet a thun a, hei bakah hian Community Shield-a 3-1 Manchester City an hneh tumin goal pawimawh a thun bawk. 

Mane aiawh tura an lak centre-forward hian England lamah pawh goal thun a harsat vak dawnin a lang lo. Mohamed Salah pet tura ngaih penalty pawh rawn chang nghalin a club tana a goal hmasa ber neih nan a hmang. Tun pre-season chhungin goal 5 a thun a, nimin tlai dar 5 khan Liverpool hian an match hmasa berah Fulham an hmachhawn. 

Harry Kane- 5 goals
Club chhuahsan maithei dinhmunah a ding reng a, mahse Tottenham Hotspur lamin an chhuah duh loh vangin Harry Kane chu a club ngai Spurs-ah a cham chhunzawm dawn. 

North London club hian pre-season inbuatsaihnaah South Korea tlawhin game hnih an khel a, K-League XI chu 6-3 a an hneh tumin Kane hian goal a khung a, a hnu ni thumah Sevilla hmachhawn lehin 1-1 a an draw tuma goal awmchhun pawh kha ama thun bawk a ni. 

England star hian Rangers 2-1 a an hneh tumin goal hnih a thun bawk a, a goal hmasa zawkah phei chuan a thiam zia lan tirin pakhat leh pakhatah a buai loh zia a lantir chiang hle. A goal hnihna pawh hi half chance an tih ang atanga a thun a ni.

Goal thun thei em em Harry Kane hian tun pre-season chhung khan goal 5 a thun a, tun tum Premier League-ah pawh a tum li nan Golden Boot pet chhuah leh ngei a tum ngeiin a rinawm. 

Gabriel Jesus- 7 goals
Gabriel Jesus hi Arsenal chuan £45 million-in Manchester City atangin an lei chhuak a, Brazilian striker hi a duh ang thalin City lamah khan a tal thei lo va, Arsenal lamah chuan centre-forward ah zalen takin a tlan thei a, a khel pawhin hma a sawn hle tih a goal thun theih danah a hriat.

Arsenal hi pre-season lamah an chetha hle a, game ruk an khelhah game nga an chak. Chung zingah chuan Florida Cup final-ah Chelsea si li fain an hneh a, Emirates Cup final-ah an mikhual Sevilla chu si ruk zetin an sawp bawk. 

Chelsea lamah hian Jesus hian tum khat chiah a thun a, Spanish club Sevilla lamah erawh hat-trick  a siam thung. Nuremberg lamah goal hnih thunin Everton lakah goal khat a thun bawk.

Pre-season an khelh laiin goal hmaah a hriam zia a lantir a, a khel kual nual bawk nen Arsenal boss Mikel Arteta pawh a hlim ngeiin a rinawm a, Jesus-a zarah tun season Premier League-ah champion chiah lo mah se top four-ah tal an lan i beisei pui phawt teh ang.