18th July 2023: Rebecca Lalbiaksangi Ralte (47) tuna Montgomery, Powys, Wales a rawngbawla awm mek chu Presbyterian Church of Wales General Assembly chuan Pastor atan nemngheh turin a rel fel ta a. Nemngheh inkhawm hi October ni 4, 7PM khian Crescent Newtown ah neih tum a nih thu ZALEN chuan a dawng.

Vawiin thleng tura a zin kawng ZALEN in a zawhna chhangin Biaksangi chuan, "Master in Psychology ka zawh hnu-in Presbyterian Hospital, Durtlang ah HIV/AIDS counsellor hna ka thawk a. Kum 2003 khan Mizoram  Synod Mission Board leh PCI General Assembly tirhin Council for World Mission(CWM)-ah Missionary rawngbawl hna thawk turin ka lut ve a, Madagascar-a tirh ka ni." tiin a bul tan dan a sawi a.

Madagascar ah hian kum 8 chhung rawngbawl hna thawkin, ‘Akany Avoko’, Remand home for Girls (Protestant Church enkawl) ah te, HIV/AIDS kohhran project-ah te ka thawk a. Volunteer in Prison Ministry (naupangah) te pawh ka thiannu nen an nei thin. Heta ka awm lai kum 2007 khan Miara Rabearisoa (Ukil), Madagascar mi pasal ah ka nei a," tiin a sawi a.

"Kum 2011 khan CWM-in Penrhys, South Wales ah, Llanfair Uniting Church-a thawk turin min sawm a. He kohhran hi denomination 8 in an enkawl a ni a, hetah hian ‘Church community worker’ niin project hrang hrangah inhmangin Home- Work Clubs, Children and Family and Evening te kan enkawl ve a ni." tiin ZALEN a hrilh a.

Hemi hmunah hian kum 8 a thawh hnuah, kum 2019 khan CWM -a a thawhna term a tawp a. Presbyterian Church in Wales (PCW)-in Mid-Wales and Border Presbytery-a ‘Mission Enabler’ ni turin an nupa-in an dah leh a, tun thlengin he hna hi an kan la thawk a ni.

"Hemi rawngbawlna kan han tan chhoh lai hian ‘Ministry’ a lut turin Pathian kohna ka dawng tan a. Mak tak maiin, chu ka kohna dawn chu tu hnenah mah ka la sawichhuah hma in mi hrang hrangin hmun hrang hrangah pastor ni turin min rawn thin a, kan Bialtu pastor leh PCW chhunga pastor dangte pawhin min zawt fo a." tiin a sawi bawk a.

 "Kan Bialtu Pastor chuan ka member nihna kohhran te hrilhin PCW kaihhruaina angin member tin te'n he ka kohna min thlawp leh thlawp loh vote an thlak a. Pathian khawngaihna azarah an vaiin min thlawp a ni. Pastor rawngbawl hna thawk tura min duhna chu Presbytery ah an thlen leh a. Presbytery chuan tha tiin PCW Ministry Department ah a thlen leh a. Ministry Department hian he pastor hna ka thawh a rem leh rem loh hriat nan ‘Bible Knowledge’ exam min hmachhawntir hnuah, Committee (Board) hma-ah min interview bawk a ni." tiin Lalbiaksangi chuan ZALEN a hirlh a.

Heng zawng zawng a paltlang hnu hian Ministry Department chuan PCW ‘Candidate for Ministry’ atan a la ta a. Pathian thu a zir dan tur ruahmanna siamfel sakin a zirna senso hi PCW hian a tumsak vek a. Cardiff Baptist College - Cardiff University ah part -time in kum 2 chhung Practical Theology a zir ta a. Certificate in Practical Theology - Qualification in Ministry and Mission pawh  a zo a. 

General Assembly, July 3-5, 2023 chuan PCW Association in the East  (Mizoram-a Synod Inkhawmpui ang) Inkhawmpui a Ordain turin a puang ta a, Pastor-a min nemngheh ni a tan October ni 4, 2023 chu a ruatfel ta bawk a ni. 

Mizorama kalphung nen tlema Pastor ordain tura kalkawng hi a danglam avangin ZALEN zawh belhna chhangin Biaksangi sawi zel danin ‘Open to call’ tiin kohhran te Pastora duh tu ten sawmna an thehlut thei a.  ‘East Montgomeryshire Pastorate’ hnen atangin a dawng a. Pu Zosapthara kohhran enkawl thin telin Pastor Bial kohhran 10 awmna a ni a, chu kohna chu Pathian kohna ber ni-a a ngaih vangin a chhang let leh ta a. 

"Presbytery in kotu kohhran ah ‘Preach with View’ nei turin ruahmanna a siam a, hemi a neih hnuah an la duh dawn nge dawn lo tih kar 2 ah vote an thlak leh a. Kohhran mipuite chuan 'Aw' tiin vote an thlak ta a ni.

"Pathian remruatna avang chauha he dinhmun thleng thei hi ka ni a, Pathian chungah pawh ka lawm em em a ni," tiin a sawi a ni.

Tunah hian a pasal Miara Rabearisoa nen hian fanu 2, Hannah Ralte Rabearisoa (kum 14) leh Seren Ralte Rabearisoa (kum 9) an nei a ni.

Rebecca Lalbiaksangi Ralte hi Mission Venga pianga seilian niin a pa R. Biakliana (L) niin a nu Lalrinsangi (L) a ni.