President thar ngaihtuahin Congress thu dawn

Admin - Oct 10, 2021

October 16 chawhma dar 10:00-ah thutkhawm tum

Congress party chhunga rorelna sang ber chu Inrinnilo awm tur hian an president thar tur chungchang bakah tun lai politics thil leh nakuma  state assembly inthlan sawiin an thukhawm dawn.

“Congress Working Committee (CWC) chu Inrinni, October 16 chawhma dar 10:00-ah thutkhawm a ni dawn,” tiin Delhi-a an party headquarters chuan thuchhuah a siamah a tar lang.

Thla hmasa khan an party hian Punjab-ah an hruaitu an thlak a, a vawi khat nan Dalit Chief Minister Charanjit Channi chuan Amarinder Singh a thlak a. Amarinder-a hi Punjab-a an hruaitu hlun ber niin an boruak pawh a tha lo.

Tun hnaiah vek an hruaitu hlun, Kapil Sibal chuan Gandhi chhungkua beiin, “Congress-ah thlan chhuah president a awm lo va. Tuin nge kohna chhang dawn? Tunge party chhungah thutlukna siam dawn?” tiin a sawi.

Hetianga thu a tihchhuah hnu lawkah hian party worker-te chu a chenna in tualah pungkhawmin tomato-in an vawm a, a car an tichhe bawk.

Sibal-a laka lungawi lohna lantir hi an party hruaitu dang, nikuma Sonia Gandhi hnena lehkha thawna party chhungah insiksawi a ngaihtu thlentu hruaitu 23, ‘G-23’ an tihte chuan an dem hle.

Sibal-a hova hruaitu dangten nikuma Gandhi-i lehkha an thawn hnuah hian party chhungah inthlak danglamna a la thleng chuang lo va, Congress hi a hniam zawngin a kal hret hreta ngaih theih a ni thung.

Nakumah hian state pangaah assembly inthlan a awm dawn a, heng zingah hian Punjab pawh a tel a. Tun laia boruak lian tak a awmna, Uttar Pradesh a tel bawk.

Share now