Aizawl July 11, 2024: INTACH Mizoram Chapter chuan Pu Buanga (J.H. Lorrain) lehkha leh sulhnu pawimawhte chu bu pali ah siamin, Mizoram Sawrkar leh Kohhran leh Zirna in archive/ library a dah turin vawiin khan heng lehkhabu te hi an hlan a. Art & Culture Minister C. Lalsawivunga hovin a pisa ah lehkhabu hlanna hi hman a ni.

INTACH Mizoram Chapter chuan Mizo ram leh hnam ro, thil hlu leh pawimawh - khawih theih leh theih loh te, hmuh theih leh hmuh theihloh chenin - zawn chhuah a, vawng him turin theihtawpin kum 1984 atang khan hma a la a. Chumi hmalakna zinga pakhat chu Pu Buanga Dictionary an tih mai [Dictionary of the Lushai Language by James Herbert Lorrain (1940)]-a a kimlo lai zawn chhuah a ni. Pu Buanga khan a Dictionary siamah khan thil pawimawh tak tak, phek engemaw zat a kim lo tih a tarlang a. Chungte chu zawn chhuah tumin hma an la a.

Pu Buanga sulhnu hi Angus Library & Archives, Regent Park College, Oxford University, United Kingdom-ah a awm thu hriat a ni a. Pu Buanga Dictionary-a kim lo tak chu a lo awm lo va. Mahse Pu Buanga sulhnu thil tam tak leh thildang engemaw zat, la hmuh ngai loh chu haichhuah a ni ta a. Hengte hi Bu 4-ah siamin chungte chu (i) Pu Buanga lehkhathawn leh a lehkha dawn thenkhatte; (ii) Pu Buanga kut hnu thenkhat, Dictionary chungchang leh thil dangte, (iii) Whilom Head Hunters (iv) Darphawka Mumang - Ziaktu: C Chama, Theiriat te a ni.

Heng lehkhabute pali te hi Mizoram State Archive, Tribal Research Institute, Mizo Language Development Board, Mizoram Legislative Assembly, Mizoram University Library, Synod Archive, Baptist Church leh Aizawl Theological College-te hnenah hlan a ni.