June 20, 2023; Mizoram chief secretary hlui Lalnunmawia Chuaungo (IAS retd.) chuan vawiin ah congress zawmin, MPCC president Lalsawta hovin sawrkar tha tak an din thei dawn niin a sawi.

Vawiin a amah bakah midangte lawmluhna Vanapa Hall a neihah thusawiin, politics a lut tura amah it lem lo an tam nia a hriat thu a sawi. "Mizoram ka rawn chhuah theihna tur a hmalatu chu CM hmasa Pu Lalthanhawla a ni a, sawrkar inthlakah CS ka nih theihna tura pawimawh tak chu Pu Zoramthanga a ni a, mimal taka ka ngaihsan pahnihte an ni," a ti.

"Pu Sawta hova sawrkar tha kan din hunah chuan tunhma a kan la hmuh ngai loh, tuna mipuiten an beisei phak loh thil tha, ram leh mipuite hmasawnna tur atana hnathawh hi kan ti thei dawn a ni tih hi ka ngaihdan leh ka hmuh dan chiang tak a ni," a ti bawk.

"Inthlan zawhah tunge kan CM ni dawn tih hian kan hmalam hun a hril thui dawn hle ti bawkin, "Chu chuan sawrkar tha kan neih dawn leh dawn loh chiang takin a hril ang. CM hi thuneitu ber a nih vang a ni," a ti.

Kan CM tur chu eirukna fihlim a ni tur a ni tih sawi bawkin, Lalnunmawia Chuaungo chuan, "Thil te tham a rinawm a ni em, thil lian thamah rintlak leh rinawm a ni em, dawt leh thu belhchiandawllo a ding a ni em, a thusawi a nunpui em tih hi kan rilruah awm sela, chumi atang chuan mipuiten duh thlang i la ka duh a ni," a ti bawk.

Politics a luh chhan sawiin, "Ram leh mipui tana tam zawk leh awmze nei zawk a ke kan pen ve theihna tur nia kan hriat avangin politics ah ka zuanglut a ni," a ti.