PULWAMA ATTACK - Pulama terror attack hi Kashmir-a kum tam tak chhunga venhim hna thawktute laka firfiakte chetna lian ber a ni.

Central Reserve Police Force (CRPF) convoy-a kal chu Pakistan-a inkulh, JeM firfiak pawl hian thihchilh bomb hmangin February 14, 2019 khan beiin mi 40 zet an thi.

India a thinrim hle a, a tukah chiah thlawhna hmangin Pakistan ram chhung, Balakot-a JeM camp chu a kap a. Pakistan pawhin chhang let zuiin Pakistan Air Force nen vansangah an inkap hman a; mahse, indona lian zawk a chhuak lo hlauh a ni.

Jaish-e-Mohammed firfiak pawla langsar tak, kum 2019-a Pulwama terror attack thlentu zinga tel chu Inrinni khan Jammu & Kashmir-a venhim hna thawktute nen an inkahnaah thah a ni.

Mohd Ismal Alvi hi Lamboo tih leh Adnan hia koh a ni thin a, Jaish chief Masood Azhar-a chhungte zinga mi a nih thu police chuan an sawi.

Amah hi Pakistani a ni a, firfiak pahnih kah hlum zingah a tel a. National Investigation Agency (NIA) pawhin man an duh zinga mi a ni.

A ruala kah hlum hi chu hriat thui thei a ni lo. Inkahna hi Inrinni tuka Pulwama-a Dachigam ram hnuaia thleng a ni a. Venhim hna thawktute hian helai hmunah hian firfiak an awm tih thu an dawn chu bawhzuiin an dap a ni.

Venhim hna thawktuten an zawn lai hian firfiakte hian an lo kap hmasa a, an inbei zui ta a. An inkahnaah hian Ismal Alvi  leh mi dang pakhat hi kah hlum a ni.

“Lethpora, Pulwama attack a thlenna tura phiartu leh ngaihtuahtu a ni a, NIA pawhin a inrawlh ngei tih an nemngheh a ni,” tiin Inspector General of Police (IGP), Kashmir, Vijay Kumar chuan a sawi.

Hlawhtlinna chang sipai leh police te chu an hlawhtlinna chanah a lawmpui bawk.