Amarinder leh Sidhu inkar buaina

Amarinder leh Sidhu inkara party chhunga neuh neuh hi a inmunna a rei tawh angreng a. Langsar taka a lan chhuahna hmasa ber chu kum 2019-a Sidhu-a minister atanga a ban kha a ni a; Amarinder-a hian local bodies portfolio a chantir duh loh avanga bâng a ni.

Sidhu-a hi kum 2017 inthlan hma lawka BJP atanga Congress-a lut kha a ni.

Minister atanga a bân hnuah an inkarah hian neuh neuh a awm zui reng a. Party chief atan hian Sidhu-a ruat a nih dawn pawh khan Amarinder-a hian nasa takin a dodal a; mahse, ruat a ni ta tho a ni.

Congress hotu lian tak tak zingah Sidhu-a lamtang an awm nual a. Heng zingah hian General Secretary Priyanka Gandhi Vadra leh president hlui, Rahul Gandhi te ngei pawh an tel.

Thla hmasa khan minister pali leh MLA thahnem tak chuan Amarinder-an a kaihhruai danah an lawm loh thu sawiin chief minister atanga chawlhtir turin party hotute an lo ngen tawh a. Inthlan leh pawh an tan a har dawn niin an sawi.

Kum thar tir maiah an inthlangtawh dawn a, Congress chuan Amarinder-a bâng hi he inthlan hmabak awmah hian an tawrh ngei rinna a lian hle a.

Captain Amarinder Singh chu Navjot Singh Sidhu nena an inkar inpawhna nasa tak a awm hnuah Punjab chief minister atangin Inrinni khan a bâng.

Sidhu hi tun hnai lawkah khan an state-a Congress chief atan ruat a ni a. A hma atang tawhin an inkarah khi a awm tawh.

Punjab-ah hian assembly inthlan an hmabak mek a, thla nga pawh hun a awm tawh lo va. Congress hian CLP meeting koh an tum mek laiin Amarinder hi a bâng.

Congress hruaitu hlun takin a nihna a bânsan thu hi a fapa, Raninder Singh chuan Twitter-ah a tar lang a. A pa hian governor hnenah a bânna lehkha a thehluh thu a sawi.

Politics lama mi thiamte chuan chief minister atanga Amarinder a bâng hi inthlan lo awm turah Congress-in an tawrh phah ngei a rinawm thu an sawi.

Amarinder-a hian kum 2017 khan Congress hi an state-a bial awm hmun thuma thena hmun hnih dawn lakpuiin hnehna an chang a, inthlan lo awm turah pawh hian kal zel a tum.

Hetih lai hian Sidhu hian a tum hi tihhlawhtlinsak loh a tum nia sawi a ni a, party chief a nih angin an party-in nakum inthlana hnehna an chang leh a nih phawt chuan chief minister nih ngei a tum.

Cricketer lar tak thin, politician-a inlet tak, Sidhu-a hi an state party president-ah hian July 18 khan ruat a ni a, chief minister hian he nihna chelh tura tih pawh hi a duh lo hle nia sawi a ni ve bawk.

Amarinder-a hian Inrinni tuk khan Congress chief Sonia Gandhi hmuin an beihna hrang hrangte chu a ning khat ta tih a hrilh nia sawi a ni.

“Hetianga intih hi a tawk ta, a vawi thumna a ni tawh. Hetiang reng renga intihna party-ah hian ka awm reng thei tawh lo,” tiin a hrilh nia sawi a ni.

Amarinder-a hian an party MLA zingah pawh tantu a nei tlem tawh hle nia sawi a ni a. MLA 117 awm theihnaa Congress MLA 80 zingah a lamtang a koh theih chu mi 15 emaw chauh an ni tawh a, heng zingah hian minister pali an tel.

MLA 50 chuang zetin Gandhi-i hnenah lehkha thawnin Amarinder-a chu chief minister atanga paih thla turin an thlen nia sawi a ni a. Zirtawpni zan tlai tawh takah khan MLA-te hi emergency meeting neihpui hial an nih phah.

A bân tak avang hian a thlaktu tur inrinsiak nghak a ni a. Hming lang zingah Punjab Congress chief lo ni tawh - Sunil Jakhar lehPratap Singh Bajwa bakah Beant Singh-a tupa, Ravneet Singh Bittu te hming pawh a lang.