DOWNLOAD OUR APP

Read latest news on your phone
play-store app-store
app-store
ad
QUARRY CHIMIN A CHHILH TE LAKCHHUAH LA AWM LO
Tualchhung
Nov 14, 2022
ZALEN, November 14; Vawiin chawhnu dar 3 leh dar 3:30 inkar vel khan Leite khawbul, Maudarh ah kawng siam hnathawk mektu ABCI company ten lung lakna atana an hman quarry a chim a, hriat theih chinah a hmuna hnathawk mi 15 vel (hnamdang Assam lam mi nia hriat) bakah, Hitachi 4 vel chhilh nia hriat a ni a, he thu ziahlai thleng hian quarry chimin a chhilh te hi lakchhuah an la awm lo nia thudawn a ni.
 
Leite khua atanga ZALEN thudawn danin, he thu ziahlai thleng hian ABCI company ta Hitachi engemawzah hmangin chhanchhuah hna thawh chhunzawm zel a ni a, quarry chim a nasat avangin zanin lamah inlakchhuah an nei thei angem tih pawh sawi a harsa nia thudawn a ni. ABCI lam chuan chhiatna thlenna hnaivai a an hnathawkte leh an lirtheite chu chhanchhuah hna thawk turin an kokir vek nia thudawn a ni.
 
Vanduaina thlenna hmun hi chhiatna thlenna hnaivai khaw hrang hrang, Hnahthial, Leite leh khaw dang atangin mi tlawmngai ten an pankhawm nghal a, hetihlai hian mipui nawlpui tan erawh tihtheih a tam rihlo hle niin thudawnna chuan a sawi.
 
Quarry ah hian mi engzah chiahnge thawk tih hriat a harsa a, quarry minin a chhilh zat pawh hi chiang taka sawi a harsa a, mi 15 vel nia hriat niin, a ai pawhin an lam thei nia ngaih a ni. Hitachi a chhilh pawh hi thudawnna thenkhatah chuan 4 aiin a tam.
 
Maudarh a quarry hi ABCI in mimal ta an hire nia hriat a ni a, vawiin a a min hma deuhin warning te pawh a awm niin an sawi a, quarry minin a chhilh te hi ABCI hnuaia thawk hnamdang, vai deuh vek nia hriat an ni a, anni bakah hian Chakma 1 a tel niin sawi a ni bawk.

Latest News & Chhiar Hlawh