Japan prime minister hlui, Shinzo Abe-a chu Thawhlehni hian an ramah sorkar chawi-mawina famkima vui a ni dawn a, hemi atana sorkarin sum a sen tur chu tun hnaia Britain Lalnu, Queen Elizabeth II vuinaa senso aiin a tam zawk dawn nia sawi a ni a, hei hian mipuite thin a tirim a, tul lo tih an tam hle.

Chanchinbu pakhat thupuiah phei chuan, “Engtin nge Abe-a vuina senso hi Queen vuina aia a tam theih?” tiin an ziak kuau.

Queen vuina senso zat kha chiang taka puan a awm lo va; mahse,  Daily Mirror chanchinbu chuan £ maktaduai 8 (yen tluklehdingawn 1.3) vel angin a ziak niin Flash chuan a chhuah chhawng a. Prime minister hlui vuina erawh yen tluklehdingawn 1.66 vel senna tur niin an sawi thung.

Mi tam tak phei chuan tuna chhut chhuah aiin a tak taka sen phei chu a tam zawk an la ring cheu va. Tokyo Olympics-ah pawh a zawh fel meuhva an insen chu an chhut lawk let aia tam, $ tluklehdingawn 13 zet a lo ni tawh a ni.

Mi dang thenkhat chuan invuina pahniha senso inthlauhna hi sorkarin a buaipuitu (middleman) a hman azir niin an sawi ve bawk.

Tokyo-a hmunpui nei, thiltih khawm lian buaipuitu (event organiser), Murayama chauhvin Abe-a vuina buaipui tura sorkarin tender a chhuah chu an chhang a, yen maktaduai 176-in an buaipui dawn a. He company tho hi Abe-a’n kum tina tlaizawng kût a huaihawt thina a rawih thinte tho an nih avangin an karah tlazep an awm a nih rinna a tilian hle a ni.

Sorkar chawimawina famkima Abe-a vui hi an ram mipuiin tul an ti lo sa hrim hrim a, Kyodo news agency-in tun hnaia ngaihdan a lakah pawh mipui 70% chuang chuan sorkar chu invuinaah a inseng nasa mah mah niin an ngai.

Sum sen tura ruahman zingah a zahve hi venhimna khauh taka kalpui tur bik atan hman a ni a, a dang chu ram pawn atanga tel tura kalte lo dawnsawnna atan a ni.

Thawhlehnia vui inkhawma tel tur hian a hmaa Prime Minister Fumio Kishida lo kawm lawk duh ram hruaitu an thleng nual tawh a. Ni thum awh tur thil hi ‘mitthi vui palaina’ tiin an sawi nghe nghe.

Ram 217 atangin mikhual 700 vel tel tura beisei niin US Vice-President Kamala Harris bakah Indian leh Australian prime minister, Narendra Modi leh Anthony Albanese te pawh an tel dawn.

Japan prime minister nihna chelh rei ber, Abe-a hi kum 67 mi niin an rama thil thleng khât tak, a laka tharum thawhna thlengah thah a ni.

An ramin sorkar chawimawina famkim nena mi an vui hnuhnung ber chu kum 55 daih tawha Shigeru Yoshida kha a ni a. Ani hi Indopui II-na hnu chiaha an hruaitu niin tuna an ramin hetiang dinhmun a neih theih nana bul tantua an ngaih a ni.

Shigeru-a anga Abe-a vui a ni ve tur leh senso sang lutuk chuan mi tam tak lung a tiawi lo va, tual chhung chanchinbu pakhat phei chuan Shegeru-a vuina, kum 1967-a neihah khan yen maktaduai 18 chauh an seng a, hei hi tun laia yen maktaduai 70 hu a nih thu a tar lang.

Khawvel ram changkang leh eibar dinhmuna tha ber pawl, Japan hian kum tam tak hnuah tunah hian thil man sang an tawng ve mek a. Mi tam tak chuan sum tam tak senga Abe-a vui ai chuan thil man sangin a sawp nat tak, sum lak luh tlem zawkte puih nana hman tur ni zawkah an ngai.

Sorkar chawimawina famkima prime minister hlui vui tuma an inpuahchah mekna hian mipuiah pawh sorkar lai tlak nat dan a hniam chak phah hle a. Kishida-a’n thuneihna a chan hnua an boruak hniam lai ber an tawng mek.

Hruaitu hlui dinhmun

Abe-a hi kum 2000-a prime minister a nih khan Indopui II-na hnua hruaitu an neih naupang ber a ni a, Indopui hnua piang zinga he thuthlenga thu thei hmasa ber a ni bawk.
Kum 2007-ah a taksa lam hrisel lohna avang leh a kaihhruai, Liberal Democratic Party (LDP)-in inthlana hnehna an chan loh zui bawk avangin a bâng.
Term khat a awl hnuah lo kir lehin kum 2012 atang khan prime minister a ni zui leh ta a, kum 2020 thleng nihna chelhin hemi tum pawh hian a taksa lama harsatna a neih vang bawkin inthlan a chuh zui lo.
A hun laiin ram mipuite duh leh ngaihsan ni mah se a nihna a kalsan hnua mi kut tuara a thih hnuah sorkarin ropui taka vui a tumna chu dodal a hlawh ta hle thung a ni.