England lalnu Queen Elizabeth II chu a hriselna dinhmun a tha lo zual a, chhungkhat laina an inko khawm mek. Kum 96 mi lai ni tawh Queen Elizabeth hi Balmoral Castle, Scotland-ah enkawl mek a ni a, a dinhmun a tha lo tih Buckingham Palace chuan an nemnghet bawk.

Queen Elizabeth fate pali leh Prince William te chu Scotland-ah hian an awm tawh a, Prince Harry pawhin Scotland hi a pan ve mek. A chanchin ngaihven hian Balmoral-ah mi thahnem tak an pungkhawm a, London lama an chenna Buckingham Palace tual zawlah pawh mipui thahnem tak a chanchin ngaihvenin an pungkhawm.
 
Archbishop of Canterbury chuan lalnu tan hian a tawngtai tih sawiin, Scotland leh Wales ram hruaitute pawhin dam leh thuai tura an duhsak thu a tarlang. Queen Elizabeth II chanchin hian ngaihven a hlawh a, ram hrang hrang hruaitu ten dam leh thuai turin duhsakna an hlan hlawm. Canada Prime Minister Justin Trudeau bakah US President Joe Biden pawhin duhsakna hi an hlan.

UK hian Thawhlehni khan Prime Minister thar an nei a, hemi tum pawh hian PM thar lakluhna hi Queen Elizabeth awmna Scotland-ah neih a ni. Prime Minister kal chhuak ta Boris Johnson leh a hmunruak luahtu Liz Truss te chuan Queen Elizabeth hi an a inenkawlna hmun Scotland-ah hian an kal chilh a ni.