Queen Elizabeth II : September 19-ah vui dawn, a ruangin London la thleng lo
England lalnu Queen Elizabeth II chu a thih atanga ni 11-na September 19 khian vui liam a ni dawn a, amah sun nan hian an rama office zawng zawng an khar dawn a ni. Hetih lai hian a ruang chuan an chenna London a la thleng lo a, naktuk hian Scotland atangin England panpui a ni ang.
Queen Elizabeth II hi September 8, 2022 khan kum 96 mi niin Scotland-ah a boral a, a aiawh turin a fapa upa ber Price Charles ruat nghal a ni. King Charles III hian a nu vui dan tur zawng zawng hi ruahmanna a siam nghal a, an ram rorelna in sang Parliament a tlawh nghal bawk. King Charles III hi an ram MP te chuan zahna leh tuarpuina an lo lan tir a, thu a sawi nghal a ni.
Queen Elizabeth II ruang hi kawng zawhpui a nih bakah mipui vantlang hmuh theih turin pholan a ni ang. A chenna Buckingham Palace, London-ah chuan mi thahnem tak an pungkhawm reng a, zahna pangpar pawh thahnem tak hmuh tur a awm tawh.
A vuina tak tak hi Westminster Abbey-ah September 19, Thawhtanni khian neih a ni dawn a, khawvel ram hrang hrang hruaitute pawh tel tura beisei an ni.