Aizawl; Mizoram Pollution Control Board (MPCB) chairman R. Thanga banna thehluh chu pawm leh pawm loh chungchang ngaihtuah a la ni lo. Environment Forest & Climate Change (EF&CC) Principal secretary Liandawla IFS chuan MPCB chairman lak dan tur recruitment rules (RR) a awm tawh vangin chumi ang a hnalak kalpui a nih tur thu a sawi.

September 23, 2021 khan MPCB Chairman R. Thanga chuan EF&CC Principal secretary hnenah banna a lo thehlut tawh a, banna lehkhaa a tarlan danin, chairman a ruat a nihnaah thu inchuh a awm thu leh chumi vanga ban mai tha zawka a hriat vangin thutlukna a siam tih a sawi. Kumin August ni 9 khan MPCB chairman post hi a zawm a ni.

EF&CC principal secretary Liandawla IFS chuan MPCB chairman banna thehluh chung-changah hmalakna an la nei thei rih lo tih sawiin, banna lehkha erawh an dawng ngei tih ZALEN a hrilh. EF&CC minister TJ. Lalnuntluanga leh Principal secretary hi home quarantine an nih mek lai a ni.

Principal secretary chuan MPCB chairman banna thehluh pawm a nih chuan, RR angin hnalak kalpui a nih tur thu ZALEN a hrilh.

Kumin September 7-9 inkara Assembly session neihah EF&CC minister chuan kum 2020 hmalam ah MPCB chairman tan RR a awm loh avangin a ruatnaah tehfung a awm loh thu a lo sawi tawh a, kumin July ni 30 khan official gazette ah notification chhuahin RR siam a nih tak thu House a lo hrilh tawh.