January 9,2023; Tun thlenga raltlan Mizoram lo lut thei lo, BSF ten Bangladesh lama an nawr kir (push back) tawh zat chu mi 932 an ni tawh. Central YMA GS Prof. Lalnuntluanga chuan, dinhmun khawngaihthlak tak leh lainatawm taka ding, ei tur mumal pawh nei lo, sin lum tur pawh nei lo, tar chak lo, naupang leh hmeichhe chak lo zawkte nawr kir an ni chu YMA in a hriatin na a ti hle tih a sawi.

Vawiin a Bangladesh Zohnahthlakte Thlavang Hauh punkhawm buatsaihah report pein, Central YMA GS chuan November ni 20, 2022 ah Bangladesh atanga sahimna zawnga rawn tlan kan unauten tlai dar 4 :47 ah Parva III an rawn thleng tih tarlangin, November ni 21 ah mi 274 ten Parva III an rawn lut lehin, chung kan unau lut hote chu BSF ten lo la khawmin, hmun chep tak, hmun pakhatah khungkhawm an ni a, he thu hi hriat a nih ve leh YMA hruaituten CM leh sawrkar hotute hmu nghalin, ruahmanna siam turin ngenna thlen nghal a nih thu a tarlang.

Central YMA GS in a tarlan danin, November ni 25 ah midang 21 an rawn tlanlut leh a, December ni 7 ah sahimna zawng dang mi 15 ramri kanin Mizoram chhungah an rawn lut leh bawk. 

December ni 12 ah khaw hrang hrangah chung mi 274 lo lutte chu semdarh an ni a, chhungkaw 10, member 46 te Mautlang khuaah dah an ni a, chhungkaw 14, member 42 te Chamdur project khua ah dah an ni a, chhungkaw 20, member 66 te Vathuampui khua ah dah niin, Parva III ah chhungkaw 29, member 149 te an awm zui a ni.

Mi 600-800 inkar vel raltlan ramhnuaiah an awm mek tih report an dawng a, December ni 28-29 ah emaw Mizoram rawn lut thei tura ngaih an ni. "Chung kan unau an sahimna atana rawn tlan te chu ramri ah ramri vengtuten India ram lolut tawh te pawh nawrlet lehin, harsatna nasa tak an lo tawk ta a ni.

"Kan unau India ram rawn lut tawh, khawvel pawhin mihring mihrinna a khawngaihna an lantir thin, an hmelmate ngei ngei pawh nisela, an nunna tura tana tlan te hum thin an nih laiin, kan Mizopuite erawh chuan chu dinhmun chu luah zo loin, an Jerusalem an rawn luh tawh hnuah pawh nawrkir an ni a, a lungchhiat thlak kan ti hle a ni," Prof. Lalnuntluanga chuan a ti.

Sub Headquarters YMA 8 ah pawh Bangladesh Zohnahthlakte Thlavang Hauh punkhawmna hun hi vawiin ah hman a ni. Central YMA GS in a tarlan danin, Mizoram sawrkarin raltlante chhawmdawlna atan Rs. Nuai 30.42 a ruahman tawh a, an damdawi mamawhte leh an ei/in tur te pawh a ruahman sak a, Central YMA leh Sub Hqrs. YMA ten tanpuina pawisa fai etc. an pe tawh bawk a, tun January chawlhkar 3 na chhungin Central YMA chuan raltlante awmna a hmunah an tlawhchhuak dawn bawk. 

Vawiin punkhawmna ah hian resolutiin 2 pass in, chungte chu;-

1. Sahimna zawnga Chittagong Hill Tract Bangladesh atanga Mizorama kan unau raltlante hi India sawrkar in mihring dikna zah sak a, sahimna an hmuh theih nan ruahmanna siam thuai turin kan phut tlat a ni.

2. Sahimna zawnga rawn tlante mamawh ngaihtuah sak turin India sawrkar kan phut tlat a ni.