ZALEN April 25, 2025; Aizawl Tuithiang Veng Local Council leh All NGO bul tumin nizan khan Tuithiang Veng YMA Hall ah Tuithiang Veng chhunga Myanmar raltlante leh raltlanten in an luah neitute koh khawm an ni a, raltlan awmte chu Tuithiang Veng khawtlanga an tih tur leh mawhphurhna tha taka hlen turin chah an ni.

Tuithiang Veng chhunga raltlan kohkhawmnaah hian veng chhunga raltlan chhawngkaw 32 atangin damlohna avanga kal thei lote tiam lovin raltlan mi 67 te an kal khawm.

He hun hi Tuithiang Veng Branch YMA President SH Lalropuia chuan kaihruaiin, Tuithiang Veng Local Council Chairman Zohmingliana chuan, India danpui ang chuan Myanmar kan unaute thawn let tur a nih laiin Mizoram sawrkar chuan a kuangkuaha, kan theih tawpin kan unaute kan chhawmdawl zawk a ni, a ti.

Tuithiang Branch YMA Vice President, Vanlalthlana pawhin thusawiin, raltlan thalai zawkte chu an ram tana bei turin a chah a. Khua leh tui diktakte pawh veng chhunga an rawn pem luh dawnin pem lehkha kan phut a, nangni chu in hming chauh hriat kan phut a. Hetiang karah hian ruihhlo zuar an awm kan duh lo a ni tiin raltlan an nih chhung chuan veng chhungah In leh lo neih ve talh tum lo turte, India ram khua leh tui dik takte chauhin an neih theih tur document hrang hrang neih ve talh tum lo turin a ti bawk.

Tuithiang vengah hian tuna raltlan vengchhunga awmsa te tih loh chu awm phal a ni tawh lo a, Local Council leh All NGO te duhdan Tuithiang Venga raltlan awm zawng zawngten an zawm tur a ni a. In luah tur nei ten raltlan in luahtir tawh loh ni se an ti bawk.

#ZalenNews