ZALEN April 11, 2025 : Chief Minister Lalduhoma leh UD& PA Minister K. Sapdanga te chuan Aizawl Ven Buk (Integrated Command & Control Centre under Smart City), Treasury Square a mi chu tukin khan an tlawh. UD&PA minister, Home minister ni bawk sawi danin tun hnaia thil thleng ngaihven hlawh tak pawh he hmun atanga chhui chhuah a nih thu a sawi.

Control Room chhunga inkhawm tawiah hian K. Sapdanga chuan thuhma a sawi a. He control room zarah hian misual, rukru leh dawt sawi ching thlengin kan chhui chhuak thin. Tun hnaia mi pakhatin, "Raltlan, silai keng ten kut min thlak," a tih pawh kha thil dik tak chu he hmun atanga chhui chhuah a ni, a ti.

Chief Minister chuan, Aizawl hmunhma lun zual lai cover vek thei CCTV network, record fiah leh changkang tak kan nei ve tawh hi a lawmawm a. A enkawlna lam hautak deuh mah se ram leh khawtlang venhimna kawngah a tangkai a ni. Duh thusamah chuan Aizawl chhung leh a chhehvel hnai vai, disaster thlen palh theihna hmun te huam thei ila a tangkai zual ang. He hmun tangkai lehzuala kan hman theih nan thawhhona tha in neih a tul dawn niin ka hria a, he hmun hmang tangkai thei department-te nen tha takin lo thawk tlang ula, kan tangkaipui lehzual thei ang, tiin thawktute a chah a ni.

Aizawl Smart City CEO CC Lalchhuangkima chuan an hnathawh dan tlangpui a sawi a. Aizawl khawpui hmun thlan bik 76 ah CCTV 237 leh Pan Tilt Zoom 39 dah a ni a. An dahna hmun zawng zawng mipui hnenah an hrilh vek lo. Hmun pawimawh lai chu an hmu thei deuh vek tawh a, hnai takah chiang takin mihring hmel hmai pawh an zoom thei. Hmun pangaah phei chuan hmel hre hranga chhinchhiah thei (Facial Recognition) Camera dah an ni. Lirthei pawh an vah velna thlengin an hre thei a, an Automatic Number Plate Recognition system hmang hian lirthei bo case 600 vel lai an ching fel tawh. Lirthei, traffic dan bawhchhia pawh an chhui zel thei a ni.

Aizawl Ven Buk (ICCC) hi April 1, 2023 khan Union Home Minister Amit Shah chuan a hawng a, vaibelchhe 87.18 senga din a ni. A enkawl nan thlatin sum nuai 7.8 lakh vel mamawh a ni. Mipui, a hmang tangkai duh tan Rs. 100 chawia hman theih a ni.