ZALEN April 20, 2025 : Lunglei district thuneitute chuan an district huam chhunga raltlante chu khuahkhirh an tum a, raltlante chu an hotute remtihna lo chuan camp atanga duh hun huna luh leh chhuah an remti dawn lo.

Tun hnai khan Lunglei SP bakah YMA, MZP leh MSU hruaitute chuan Thaizawl hmuna raltlan camp an tlawh a, he hunah hian thu sawiin Lunglei SP Jerome Lalmuankima chuan raltlan camp-ah duty dah an nih tur thu leh duty-te leh raltlan camp leader te remtihna lo chuan camp atanga duh ang hun huna luh leh chhuah a rem tawh dawn lo tih a sawi a.

SP chuan raltlante chu Mizoram hmun hrang hranga buaipui mek leh thalai tam tak suattu ruihhlo tawlhrutu ni lo tur leh a tilui an awm a nih chuan dan anga hrem an nih tur thu a sawi a. License nei lo va lirthei khalh lo tur leh an khalh lui a nih chuan dan anga hmalak a nih tur thu sawiin, Kenbo 125 bike-te chu dahkhawm an ni dawn tih a sawi bawk.

Thaizawl camp an tlawhnaah hian YMA sub. hqrs.Treasurer K. Lalhruaitluanga, Lunglei MZP Hqrs. President Johan Hmangaihzuala Ralte leh MSU Regional Hqrs. Lunglei Secretary C. Lalthlamuansanga ten thu an sawi bawk.

Thaizawl refugee camp-ah hian tun dinhmunah chhungkua 167 awmin, mi 746 an cheng mek a ni.