ZALEN April 8, 2025 : Vawiin khan, MZP Pisapui-ah MZP General Headquarters Extended OB leh Adviser meeting neih a ni a. Mizoram a raltlante dinhmun sawiho a ni, raltlante hnawk tihna tawngkam a tam ta pawi an ti a, inunauna tichhe thei zawnga hmalakna leh tawngkam chhakchhuak lo turin mitin an ngen.

Meeting hi President H. Lalthianghlima chuan a kaihruai a, meeting chuan Myanmar leh Manipur buaina avanga Mizoram a raltlante chu Mizo mipuite'n duat taka an lo dawngsawng leh tuamhlawm hi a Mizo ziain, Christian nihna anga tih tur dik tak tiah a ngai a. Mizoram chu Zofate Inpui a nih avangin, Mizoram chhehvel a harsatna tawk ten pan berah an rawn nei hi, Mizote vanneihnaah an ngai an ti.

Meeting chuan, raltlante Mizoram-ah an tam tawh avangin hnawk tihna tawngkam pawh a tam ta hle a. Raltlante zingah thil tisual an awm chuan, dan anga hrem thin turin thuneitute a ngen a. Chutih rualin eng emaw hlekah raltlante phih awhna tur dap a, raltlante tih hmingchhiat nana thu thehdarh ching an awm ta fo chu vanduaithlak a ti a. Hei hian Zofate inpumkhatna leh in unauna a ti chhe hle a ni, an ti.

Hetiang thu belhchian dawllo hmanga raltlante puh chhiatna, finfiaha rang taka chhuichhuaktu Mizoram Police-te chungah MZP chuan lawmthu a sawi nghal a ni.

Meeting chuan, Raltlante enkawl dan leh chhawmdawlna mumal zawk a awm theih nan, Mizoram sawrkar hian dan mumal tak siam thuai se a duh a. Hei hian Mizoram mipuite leh raltlante inkarah inhriatthiamna a siam a beisei a ni.

MZP chuan, Zofate inunauna tichhe thei zawnga hmalakna leh tawngkam chhakchhuak lo turin mitin a ngen ni.