ZALEN April 2, 2025 : Vawiin khan Lunglei District Bawrhsap Navneet Mann hovin Lunglei DC Conference Hall-ah India khua leh tuite hnena pek thin nihna tihchianna (identity card) hrang hrang ram dang mi, a bikin thenawm ram Myanmar leh Bangladesh atanga chhan hrang hrang avanga lo lutte hnena pek chhuah a nih loh nan hma lak dan tur an sawi ho.

He hunah hian DC office-a officer-te bakah, card/certificate hrang hrang - Voter ID Card, Aadhaar Card, Birth Certificate, Ration Card, etc. pe chhuaktu office hrang hrang ai awhte, Lunglei District VC/LC Association leh Lunglei Sub-Headquarters YMA aiawhte an tel.

Bawrhsap chuan ram dang atanga raltlan emaw, dan ang emaw, dan ang lo emawa lo lutte'n India khua leh tuite hnena pek thin ID card hrang hrang neih an tum thin a, chu chuan khua leh tuite chanvo leh hamthatna hmuh tur a tikiamin, a chhuhsak thin tih sawiin, hemi veng tur hian khua leh tui ni lote hnena ID card pek chhuah a nih loh nan fimkhur a tul a ni, a ti.

He hunah hian ram dang mite hnena ID card hrang hrang pek chhuah palh venna tura fimkhurna tur leh hma lak dan tur rawtna hrang hrang bakah, harsatna awm thinte tar lan leh sawi ho a ni a. Certificate leh ID card dilna atana finfiahna (proof) leh hriatpuina pek chhuah chungchangah te, certificate/ID card lem hmang an lo awm pawha hmu chhuak vat thei tura endikna kawngah te mahni zawn theuhvah fimkhur leh tan lak lehzual ni se, tih a ni.

Ram dang mite'n lirthei, ram, in leh bungraw dang an lei theih nana khua leh tuite zinga mahni hming leh nihna lo hawhtir a awm loh nan mipuite pawh fimkhur lehzual a tul thu te, hemi kawngah hian khua leh tui zawng zawngte tan ho a tul thu te tar lan a ni bawk.

Lunglei District-a raltlan awmte fel taka chhinchhiah a nih thu leh DC office atangin temporary ID siamsak thin an nih thu tar lan a ni a. Lunglei DC office-in an chhinchhiah danin, tun dinhmun (April 2025)-ah Lunglei District chhungah Myanmar mi raltlan 1,971 leh Bangladesh mi raltlan 63 an awm mek a ni.