DOWNLOAD OUR APP

Read latest news on your phone
app-store

RAM DANG SIKUL ZIRNA LEH A BEHBAWMTE

Mar 07, 2015

RAM DANG SIKUL ZIRNA LEH A BEHBAWMTE

- Laltanpuia Pachuau Kan awmna state New South Wales sorkar dan Education Act 1990, Section 22-na ah chuan heti hian a inziak a: “Compulsory schooling-duty of parents (1) It is the duty of the parent of a child of compulsory school-age to cause the child: (a) to be enrolled at, and to attend, a government school or a registered non-government school...” He danin a sawi ber chu naupangin kum 6 a tlin tawh chuan a nu leh paten sorkar sikulah emaw sorkara in-register sikulah an kaltir tur a ni tih a ni a. Kum 5 an nihin sikul an tan tlangpui a. Kan fanu upa zawk pawh sikul kal rual a nih ve tawh avangin tun thla tir khan KG class a tan a. Nikum lama pre-school-a kalnaa a thil lo zir vangte leh in lama a nuin a lo zirtir avang tein school a han kal chu rinaiin a harsat lo hlein kan hria. Sikul hi zing dar 9:20-ah an tan a, tlai dar 3:20-ah an bang leh a. New South Wales-ah hian sikul tan leh ban hun hi a tlangpuiin dar 9.00 am leh dar 3.00 pm a ni a. Mahse, sikul zawng zawng tan hun leh ban hun a inang vek lo. Sikul tin hotuten a tul dan azirin tan hun hi an ruat a; mahse, zing dar 9 bawr velah a ni tlangpui. Sorkar sikula fate kal dawn chuan mahni veng chhung sikula kaltir tur a ni a. Thenawm veng huam chhung bul hnai tea khawsa tan lo chuan veng dang sikul tha tih vanga admission va dil ang chi hi an pawm lem lo. Entirnan, Durtlang veng nu leh paten Dawrpui veng Primary School-ah an fate sikul kal tir duh ta se, Dawrpui veng huam chhung an nih loh avangin admission an hmu mai lovang. Chhinga venga cheng chu ni se, veng thenawm an nih avangin Principal-in hriatthiamnain a lo admit thei. Keini pawh kan veng chhung sikul ni lo, thenawm veng Oatley West Public School-ah kan dil a. Veng inrina awm kan nih vang pakhatin admission kan hmu a. Kohhrana kan thian thenkhat fate sikul kalna a ni bawk avangin, kan lawm hle. Australia-ah hian sorkar sikula zirna hi a “thlawn” a ni a. Amaherawhchu, sikul uniform man te, excursion fee te, voluntary contribution leh sikul program hrang hrang man pek ngai a tam hle. New South Wales hi Australia-ah chuan sorkar sikul nei tam ber a ni a, education department tar lan danin 2011/2012 khan zirlai pakhatah sorkar sum $ 15718 zel sen a ni. Naupang pakhat zirna atan Rs. 766,123.62 ang zel sorkarin sum an seng tihna a nih chu. Private sikul fee hi kum khatah $20000 bawr vel a ni. Thu dang daih han sawi kai lawk ila, kumin February 7 khan Melbourne veng pakhat sikul Croydon Public School-ah chuan Pu Lalnunmawia Fanai, Melbourne Mizo Association President leh mi thahnemngai dangte hmalakna zarah Mizo naupangten Mizo tawng an zir tan ve tlat mai. Pu Valtea sawi danin, “Victoria School of Languages (VSL) chuan Melbourne Mizo Association dilna chu ngun takin a ngaihtuah a, zirlai tur an tlem deuh dawn avangin zirtirtu pakhat tan chauh hlawh an pek theih thuin an chhang a. Mahse, ‘A tan nan chuan a pawi lo e’ tiin Febuary 7 atang khan kan zir tan ta a ni. A thiam leh thiam rih lote pawh hmun khatah zirtir an ni dawn a. Year 1 atanga year 12 thleng an zir ang a, an zirlai hi sorkar accredited a ni bawk. Tunah hian Croydon Primary school-ah Inrinni apiangin zing dar 9 atanga dar 12 leh a chanve thleng an zir tawh dawn a ni. VSL hian senso tam zawk chu tum mah se, zirlaite hian kum 1 atan $ 50 an chawi ve dawn a ni. Zofate zingah Halkha, Falam leh Teddim chuan (anmahni tawng) an zir tawh a, keini hi 4-na kan ni. Zirtirtu hi MMA chuan 2 min thlang a, kan inken ve ve hnuah Pu Rosiama hian a chelh dawn ta a ni. A hman loh changin ka lo zirtir ve thin ang.” Melbourne awmna state Victoria sorkar hian hnam tlem zawkte hmakhua ngaiin mahni tawng an zirna kawngah hma a lakpui nasa hle. Tun hnai Mizoram sikul tan leh ban hun thlak danglam tura sorkar thuchhuak ang deuh hian Sydney-ah pawh nikum lam khan boruak a awm ve deuh va. New South Wales state chhunga sorkar project hmalakna tanpui tura agency din Infrastructure NSW chuan nikum kum tawp lam khan sikul tan hun sawn danglam tura rawtna a siam a. Rawtna a siam chhan ber chu sikul naupang zirlai zat pung tur thlirin traffic a khawih nasa dawna a hriat vang a ni. NSW Education Minister pawhin a han uksak ve deuh va; mahse, cabinet pass tur erawh chuan sawihona a la awm lutuk lo. Infrastructure NSW hian sikul tan hma a nih chuan traffic jam a nep dawnin a sawi a. Teachers’ Union erawh chuan he rawtna hi rawtna thaah an ngai lovin, zirlai zat nasa taka pung tura chhut a nih chuan sikulah ekbeng lova sikul building sak belh mai thain an hre thung. Sorkar chhut dan chuan 2031-ah hian zirlai 173,000 chuang neih belh an inbeisei a. Chu chu 23%-a punna a ni dawn a ni. He rawtna kal zel thlawpna nipahfawmin NSW Premier (Chief Minister) Mike Baird-a’n tun hnai khan thlan tlin a nih leh chuan electric thir ban enkawlna privatise an tum atanga sum hmuh theih an beisei $ 20 billion atangin education sector ah $1 billion dah a nih tur thu a puang nghe nghe a ni. Sikul tan hun tihdanglam hian traffic jam a tihziaawm theih dawn laiin nasa takin nu leh pate chhungkaw relbawl dan a tihbuai dawn avangin Education department lam chuan fimkhur takin thuchhuah an siam a: “(any changes to start and finish times) would need to ensure that the changed schedule is of benefit to students and caters for all family needs and situations,”an ti a ni. Mipui rorelna kan tih democracy hi an hman thatna ramah chuan sorkar hian thil tih ngei ngei tul a nih loh chuan mipui duh dan, a bikin nu leh pate ngaihdan, a ngai pawimawh hle a. A nghawng turte ngaihdan hi uluk takin a ngaichang a, a zahthiam hle. Zah lova thil a tih tlang pawp chuan mipuiin hremnan an vote tling duh lo khawp. Kan ramah chuan sorkar hian mipui hi a pu (master) a ni tih hre lovin a chungthlak fo va. A chang leh kutdawh hnamah te min chhuah a. Sikul tan hun sawn chungchangah pawh hian a ni tho. Sorkar hotu lam thusawi chhiar theiha awm chu Parliamentary Secretary (Education) Joseph Lalhimpuia thusawi te hi a ni deuh berin a lang. Nikum August thla khan Lunglei Congress Bhavan-ah zirna chungchang heti hian a sawi niin Pu Vanneihthanga Vanchhawng, LPS reporter chuan a ziak a: “Sorkarin education siam tha tura hma a lak naah hian kan nunphung thenkhat mil tur ringawta education hi kalpui chi a ni lo va, education kalphung mil tur hian mipuite kan insiamrem a tul zawk a, kan mut hun leh thawh hun te, kan ei leh in leh kan thil tih dan thenkhat thlak danglam a tul a nih pawhin i thlak danglam ngam ang u.” Report dangah chuan hemi zulzui tho hian, a tawpna tawngkam dang deuhvin, “…school education ruahmanna milin kan mut hun leh thawh hunte, kan ei leh in (hun) te pawh mipui in kan thlak ve tur a ni” tiin ziah lan a ni a. MSU erawh chuan he sikul tan hun tihdanglam tum chhan ber nia a sawi chu, Infrastructure NSW-in traffic ngawr ngawr thlira rawtna an siam ang deuhvin, Aizawl traffic jam tih nepna tur niin an sawi: “Kum 2012, September 24-a Co-ordination Committee on Traffic Management meeting, Transport Minister Office a neih chuan agenda 14-naah school timing chungchang hi an ngaihtuah a, ‘School Education hnuaia School timing ngaihtuah ho meeting chuan tha in a hria a, meeting leh ah Director School Education sawm nise. An Department ngaihdan pawh rawn keng tel turin hriattir ni bawk se’ an ti. MSU thuchhuah hi a dik a nih chuan kan sorkar hotute’n thudik an sawi lo tihna a ni anga. Sikul tan hun sawn hian thatna reng reng a neiloh vang ni lovin Aizawl traffic jam chinfel tum vanga Zoram pum pui nu leh pate khawsak dan thlak dawrh hi thil fel lo tak niin a lang. Sorkarin thudik sawi lova thu dang hmanga mipui a hrual tumna phei hi chu mipui zah lohna a ni e.
Share now