Aizawl February 10, 2024 : Vawiin khan MZP General Headquarters, Emergency Meeting MZP Pisa Pui- ah neih a ni a, Rangvamual-a Govt. Nepali Primary School zirlaite sikul kawt tuala zirna an kalpui chungchanga hmalak zel dan tur rel a, Thawhtanni hian Sikul hulhliap zar hnatlang an ko.

Govt. Nepali Primary School zirlaite class room indaih lohna avanga, hun rei tak sikul kawt tuala class an lak avang leh MZP Branch Rangvamual hma a lo lak tawhnain ngaihsak a hlawh tawk loh avangin, MZP General Headquarters, Aizawl chuan ni 7 February, 2024 (Nilaini) khan a hmunah an tlawh a. Zirlaite ni sensa leh ruah sûr hnuaia class an kal chu pawi an ti.

MZP chuan February 10, 2024 ral hma ngeia ruahmanna lailawk sawrkar thuneituten an siam lo a nih chuan hma a lak tur thu a lo sawi tawh a. Meeting hian vawiin February 10, 2024 (Inrinni) thlenga sawrkar hmalakna engmah hriat a nih loh avangin, karleh Thawhtanni (February 12, 2024) hian Sikul hulhliap zar hnatlang a ko nghal a ni.

MZP chuan, Sikul hulhliap zar hnatlangah hian zirlaite hmakhaw ngaitu thahnem ngaite chu a tam thei ang ber thawkchhuak turin a ngen a ni.

Govt. Nepali Primary School, Rangvamual-ah hian zirlai 127 (Nursery - 30, K.G - 22, Class I - 27, Class II - 19, Class III - 16, Class IV - 13) an awm mek a, Zirtirtu a nghet- pahnih, MR zirtirtu pakhat leh SEDP zirtirtu pakhat an nei mek a ni.