Aizawl: Aizawl khawpui leh a chhehvela zu in thin ten an in tam ber Rangvamual leh Phunchawng a zu siam chu hriselna atan a hlauhawm hle niin Excise & Narcotics Department thawktu te chuan ZALEN an hrilh. 

Excise & Narcotics Department thawktu te chuan tunlaia Rangvamual leh Phunchawng a zu zuar ten zu siamna atana an hman ber chu instant yeast a ni tiin he dawi zu siam nana hmang hi 80% vel nia an hriat thu an sawi a. "Instant yeast hi chhangthawp siamna atana hman thin a ni a, mahse zu zuar te hian yeast leh chini nen pawlhin zu rim a nam ve nan 'Khamir' (zu fe pangngai) tlem an telh leh a, hemi hmang hian ni khat chhung lekin zu tam tak an siam thei a. Heng an zu siam hian kal, thin, chuap leh lung te a khawih a, lungphu chawla thihna a thlen tam hle a ni," an ti.

Excise & Narcotics Department thawk te chuan tunhma chuan zu chu thlawr thin anih avangin zu siamna factory tihchhiat pawh a awlsam a, mahse tunah chuan lei lai khuarin zu an siam tak avangin factory tihchhiat pawh a hautak hle niin an sawi a. "Zu factory tihchhiat hi a buaithlak em em mai a, factory 10 tichhe turin mi 30 te a ngai a. Factory hi 200/300 dawn a awm avang leh ramhnuai hmun fianrial tak tak te pan a ngaih thin avangin a buaithlak hle a ni," an ti bawk.