Taliban hian United States leh ram dang sipaiten Afghanistan an chhuahsan lai mekin ram zauh tumin beihpui an thlak a, ram chhung hmun hrang hrangah tharum thawhna a thleng nasa.

Zirtawpni pawh khan Afghan sipaite nen Spin Boldak-ah nasa takin an inbei a, chhim lama Pakistan nena an inrina khua hi helho hian an la tawh a, sipaite hian chhuhsak tumin beihpui an thlak.

He khua hi Afghanistan leh Pakistan inkalpawhna ber niin sumdawnna hmun a ni a, khawthlang lam ramten an thlawp Kabul sorkar tan sum hnar ber a ni.

Chhim lam ramri-ah hian rei tak chhung chu Taliban hian hma an la nasa hle a, district eng emaw zat chu an la tawh.

Taliban hian hmar lama Iran, Uzbekistan leh Tajikistan ram nena an inrina khuate an lo la tawh bawk.

Al Jazeera chuan hel pawl hian Afghanistan ram zahve chu an thunun leh tawh tih a tar lang a, an khawpui ber pawh an hnaih leh tawh hle niin a sawi.

Afghanistan-a indona a chhuah mek lai hian Afghan vice president-in Pakistani sipaiten thlawhna hmangin Taliban an pui nia a sawi avangin Kabul leh Islamabad inkar a khi thar hle bawk.

Pakistan chuan puhna hi an pha nasa hle a, foreign ministry chuan, “Kan ram chinah kan sipai leh kan mite an himna turin hma nasa takin a la,” tiin a bak an dai loh thu an sawi.

Afghanistan atang hian ram dang sipaite hi kum 20 zet an awm hnuah an chhuahsan dawn a, September 11 hian chhuahsan fel an tum.

---------------------------------------------

Afghanistan-a indona nasa tak a chhuah mek laiin Afghan sorkar leh Taliban aiawhte chu nimin khan Doha khawpuiah remna zawngin an inbiak chhunzawm.

Lehlam lehlam hi Qatari khawpuiah hian inbia leh be lo karin thla eng emaw zat an awm tawh a. Hetih mek lai hian Afghanistan atanga ram dang sipaite an inthiar chhuah mek laiin tharum thawhna a thleng nasa a, hei hi Taliban hel pawl tiha puh an ni.

Tun tuma inbiaknaah hian sorkar palaite hi mi pawimawh tak tak niin chief executive thin, Abdullah Abdullah pawh a tel a. Sorkat hian inbiakna chawlhsan lailawk thin chu tihfel thuai thuai a duh nia sawi a ni.

“Abdullah Abdullah hian Taliban aiawhte hnenah hian inremna tura mutan ber hi uluk takin a sawipui dawn a ni,” tiin Afghan sorkar palai thupuanghtu, Fraidoon Kwazoon chuan Al Jazeera a hrilh.

“Afghanistan-a buaina hi inbiakna azir a ni a, muanna hi inbiakna hmang chauhva awm thei a ni,” a ti.

Taliban thupuangtu, Mohammad Naeem pawhin an pawl chu inbiak leh remna tura insiam rem chu an inpeih reng tih a sawi nawn leh a. “Dawhkan kil chauhvin harsatna awmte hi tihfel theih a ni,” a ti.

Naeem hian an rilru ang bawkin Afghan sorkar pawhin an put ve a ngai niin a sawi bawk.

“Kan harsatna tifel tur hian an duh leh thil tak tak an pho lan a tul a ni,” a ti.