ZALEN November 18, 2023 : Tun kar chhung khan Mizoram district pakuaa National Programme for Prevention and Control of Deafness (NPPCD) clinic-a inentir 604 an awm a, ri hriatna lama harsatna nei 379 hmuhchhuah an ni.

Mizoramah NPPCD programme hi district pakua - Aizawl East, Aizawl West, Champhai, Kolasib, Lawngtlai, Lunglei, Mamit, Serchhip leh Siaha District-ah te kalpui mek a ni.

He programme hnuaiah hian beng lama mi thiam bikte ENT doctor, medical officer, audiologist, audiometric assistant leh hearing instructor te district tinah an awm a, beng hriselna lama hmasawn turin hma an la a ni.

He programme hian a tum ber chu beng natnate a hma thei ang bera hmuhchhuaha bengngawnna thlen lo tura tihdam te, bengngawnna laka inveng tura mipui zirtirna pek te, damdawi leh inzaina hmanga beng natna hrang hrangte tha zawka enkawlna kawnga hmalakte leh bengdar mamawhte a tul dan anga refer te a ni.

Programme hnuaiah hian beng enna leh beng zaina khawl leh hmanrua chi hrang hrangte lei a ni.