ZALEN February 2, 2025 : Nimin khan Transport Directorate Conference Hall-ah kum 2025 fimkhurna thla ‘road safety month’ hawnna neih a ni a. February thla chhung hian police leh transport department thawktute chuan sawi lawk awm lovin lirthei endik hna, ‘surprise checking’ neih thin an tum.

Kumin road safety month hawngtu, Transport Secretary Zosangliana chuan, “Dan zawm hi kan zavaia him tlanna a nih avangin zawm ngei hi kan tih tur a ni,” a ti.

Mizoram chhunga lirthei chetsualna tam zawk chu tlai lama thleng thin a ni tih sawiin, “Mizorama lirthei chetsualna thleng zinga 75% lai hi driver fimkhur loh vanga thleng a ni a. Passenger-te himna hi driver kuta innghat a nih avangin driver-te an fimkhur leh zual a pawimawh a ni,” a ti bawk.

Transport secretary sawi danin kum nga kalta, 2020 atanga 2024 chhungin Mizoramah lirthei chetsualna tum 492 thlengin thi 423, hliam na 185 leh hliam na lutuk lo mi 288 an awm niin a sawi bawk.

Thusawitu dang, Transport Director Er. R.Lalrammawia chuan Mizoramah lirthei ziah luh 3,20,000 chuang a awm nia sawiin hetih lai hian lirthei 80,000 chuangin document an tinung lo niin a sawi bawk.

Kumin road safety month thupui atan hian ‘Fimkhur leh him takin lirthei khalh thin ang che’ (driving with safety & care) tih hman a ni.