ZALEN April 22, 2025 : Hachhek bialtu MLA Robert Romawia Royte chuan Kolasib Deputy Commisssioner leh District magistrate Robert C. Lalhmangaiha chu vawiin April 22, 2025 khan Kuhva ro man sa tihral a nih dan a hnuai a mi ang hian zawhna a zawt a, hard copy leh online a chhanna thawn turin a ngen bawk.

Dear, Pu Robert C.Lalhmangaiha,

Pathian zarah i dam that ka beisei. Kei pawh ka dam e. DC&MA Deptt a kan thawhho lai te kha a ngaihawm hle mai.

Tun laia issue pawimawh tak, kuhva ro man sa tihral dan chungchangah thudik hriat ka duh a, a hnuaia documents te hi min lo pe ta che. Ka zin lai a nih avangin a hard copy bakah 'online' in min rawn thawn tel hram bawk la aw please:-

1. Thingdawla Kuhva ro tiral/dispose tura Court in Order a chhuah copy (Court order).

2. Kuhva ro man sa tiral tura Auction system/Hralh chhawn system hmang tura decision lakna Notesheet/file noting xerox copy.

3. Auction Notice Copy.

4. Auction Notice TV, Chanchinbu leh Notice board a publish/display a ni tih proof-na copy.

5. List of Auction Bidders leh an bid-na details te copies.

6. Auction bidders te zing atanga Authority in a changtu tur a thlanna Minutes leh Order copies.

7. Kudam atanga kuhva ro phur chhuak tura thupekna copies.

8. Kuhva ro Auction chhangtute sum pek Kolasib DC&DM in a dawnna Receipt copy leh Sorkar sum tura Challan hmanga Treasury-a a chhun luhna copy.

Mizoram sorkar dan ding lai anga MLA ten documents kan dil chhuah theih angin min pe rang turin ka dil a che.

Ram tana i rawngbawinaah duhsakna ka hlan a che.

Sincerely Yours,

(ROBERT ROMAWIA ROYTE)