June 24, 2023; Rs. Vbc 17 chuang man hu ruihhlo (heroin) Mamit Police ten Mamitah an man a, ruihhlo phurhna motor leh a phurtu hnam dang pahnih Mamit Police Stationah thu zawhfiah atan kawl mek an ni.

Nizan (Ni 23/6/2023) khan Mamit khaw luh dawn, Highway No 44A peng (Junction)ah, Mamit Policete chu lirthei lut chhuak chhinchhiah felin an duty a, Aizawl lam atanga Tripura lam pana kal Bolero Pickup Registration No TR 01 AV 1881 chu tidingin an enfiah a, he motor hian sawhthing 20 bags (50kg bag) a phur a, driver te chetdan leh tawngkam atanga rinhlelhawm nia an hriat avangin uluk zawkin an enfiah a, motor chhuat tih danglam hnuaiah ruihhlo (heroin) sahbawn bawm 270 a dah, 3.47 Kgs, International Market a Rs 17.36 Cr man hu chu an man ta a ni. Motor hi a chhuat chungah, a chhuat pangngai ang taka siam belh in, kawpza hmanga kaihthleh theiha siam a ni a, hemi karah hian heng ruihhlite hi an thukru a ni.

Ruihhlo phurhna motor, motor khalhtu leh Handleman hi Mamit Police Stationah kawl mek an ni a, Driver hi Md Idrish Miah (36) S/o Md. Nayab Ali, Nrajendranagar Tripura niin Handleman hi Khugon Das (28) S/o Borun Sutro, Jeneria, Tripura a ni a, Ruihhlo kaihhnawiha man lirthei hi Ni 04/05/2023 a Bachhu Miah S/o Nanu Miah, Matinagar Rajenmura Pandabpur, W. Tripura hminga register a ni.

Ruihhlo kaihhnawiha man hnam dang pahnihte hian Seling ami sawhthing phur tura Tripura atanga tirh an nih thu leh an chaw ei laia sawhthing an lo load fel vek thu te, chaw ei khama an lo let leh mai thu sawiin damdawi chungchang hriat an neih loh thu an sawi. He thu buatsaih lai hian thuzawhfiah tura kawl mek an ni.

Ruihhlo leh a kaihhnawiha mihring leh lirthei man chungchangah hian Mamit Police Station ah Case No 46 of 2023 Dt. 24/6/2023 U/s 21(c), 25, 29 ND&PS Act ziah luh a ni.