Aizawl : New Delhi a cham mek Rural Development Minister Lalruatkima chuan Central Sawrkar mi pawimawh hrang hrang kawmin, a Department chan chhunga Mizoram mamawh hrang hrang a sawipui.

RD Minister Lalruatkima hian Zirtawpni khan Ruolkhumlien Buhril, IAS, Secretary, Department of Land Resources hmu in PMKSY (WDC) scheme chungchang a sawi pui a. Secretary hian he scheme zinga project thenkhat State Sawrkar khawih tawh tur a an tihte chu Central chuan chhunzawm a tum tawh lo a. Chu ai chuan leilung a tuihna hrang hrang awmte humhalh na tur scheme thar duan an tum thu a lo hrilh. He scheme thar hi ‘Springshed Development’ lam hawi a nih tur thu sawi in Sawrkar kum kal mek chhung ngei hian Central Sawrkar chuan thu thar an rawn neih ngei a beisei thu a sawi a. PMKSY(WDC) hnuaia Batch-III kalpui mek te tana pawisa la sanction loh awm nuai 3300 atangin nuai 1500 chu rawn sanction thuai an tum thu a lo hrilh a ni.

RD Minister hian Amarjeet Sinha, IAS, Secretary, Ministry of Rural Development chu hmu leh in tunhnai a MGNREGS (ni za inhlawhna) hnuaia mipui inhlawhna hun rei tak pek tawh loh, tunhnaia nuai 5300 lai an rawn sanction avangin lawmthu a hrilh a. Chutih lai chuan mipui inhlawhna bat sak hi an pawisa rawn sanction hian a daih lo tih hrilh in, cheng nuai 7700 vel kan la mamawh thu Union RD Secretary a hrilh a. Union RD Secretary hian mipui inhlawhna an la bat chu Christmas hma in rawn sanction a tum thu a lo hrilh a ni. Tun dinhmun ah hian Mizoram ah Ni za inhlawhna hi ni 72 inhlawh tawh niin, kumin atana inhlawhna phal zat ni 88 chu kan khawpkham loh tur thu Minister hian a sawi a. Union RD Secretary chuan hemi hi ennawn an phal thu leh Mizoram in ni za an inhlawh ngei theihna tur in an lo ennawn dawn thu a sawi a. Hemi chungchang hi December ni 11, 2019 ah Mizoram Sawrkar aiawh official te nen lo sawiho pui an tum thu a lo hrilh a ni.

Hei bak ah hian Lalruatkima chuan SPMRM scheme Mizoram a RD Block 4 a kalpui mek chungchang a sawipui nghal a, March ni 31, 2020 a he scheme hi tihtawp a nih chuan pawisa tamtak hman hman loh a awm dawn a. Chuvangin a scheme hi pawhsak sei tur in a ngen a. Union RD Secretary chuan a ngen ang hian lo bawhzui a tum thu leh, Central Sawrkar pawhin an pawhsei ngei a rin thu a lo hrilh a ni.

Mirethei insak tanpuina chungchang pawh sawi chhuak in RD Minister hian Mizoram tana allocation awm mek chu kan indaih loh thu a thlen a. Union RD Secretary hian a theih ang in Mizoram tan PMAY(G) scheme hnuai ah allocation rawn tihpun a tum thu a lo hrilh bawk.

RD Minister hian DoNER Seretary chu tlaiah a hmu leh a. DoNER Secretary nen hian inkawmna hun tha tak neiin Mizoram chu kawng engkim ah hmasawnna tur kan la ngah avangin rawn duhsak tur in a ngen a. RD Department atangin Project hrang hrang te siam an tum thu sawiin, DoNER Secretary hian kumin atan chuan kan pawisa neih kan hmang zo tawh a. Kum thar project a rinluh tur in Concept Note lo siam turin RD Minister hi a lo hrilh a ni. Heng bakah hian Mizoram chhung a DoNER in project hrang hrang a neih te sawi ho nghal niin, heng project la zawh loh te hi RD Minister hian Chief Minister leh Chief Secretary lo sawipui a tum thu a hrilh a ni.