Russia-a Wagner mercenary group chuan Russia-a sipai hotute paihthlak tumin ‘an kal mek’ tih a sawi a, hemi hma lawkin Kremlin chuan ‘ralthuam cheleka hel’ tiin a sawi.

Yevgeny Prigozhin hian a Wagner fighter-ten Ukraine ramri kânin Russia an pan a, Rostov-on-Don an lut tih a sawi.

Prigozhin chuan a mite hi an hmaa ding apiang tichhe turin an kal tih a sawi.

Rostov governor chuan mipuite chu chiai lo tur leh pawn chhuak lo turin a ti.

Prigozhin-a hian a sipaiten Russian sipai helicopter chu ‘civilian-te a kah avangin’ an kap thla tih a sawi a. A hmun leh eng ang chi nge tih pawh an sawi lo.

Wagner Group hi mi mal pawl, ralthuam nena chea tualthattu pawl an ni a, Ukraine-ah Russian sipaite nen tangrual an ni.

Kyiv an beih danah inthurual lohna tam tak an nei a, Prigozhin-a hian tun hnaiah Russia sipai hotu liante chu a sawisel nasa hle.

Zirtawpni khan kum 62 mi, an hitupa hian sipaite hian missile hmangin a sipaite beih an ni tih a sawi a, chhan let a ni dawn tih a sawi a. Beih an tawk nia a sawi hi finfiahna erawh a awm lo.

Russia thuneitute erawh chuan Prigozhin-a sawi hi an pha a, ‘dan lova a chetna’ chu titawp turin a ti bawk.

Prigozhin-a hian Russia sipai hotu ‘mi sualte’ chu tihtawp a tul thu leh ‘dikna atan ke an pen’ tih a sawi.

“Kan mite thattu, Ukraine indonaa Russian sipai sang tam takte hi hrem an ni ngei ang,” tiin social media platform Telegram-a audio message a tihchhuahah a sawi.

“President thuneihna, sorkar, police leh Russian guard hian an tih tur an ti mai tur a ni a. Kan chet dan hi sipai helna a ni lo va, dikna kawng zawhna a ni a. Sipaite va tihbuai tumna a ni lo,” a ti bawk.

Putin-a dinhmun a him em?

Russian President Vladimir Putin chuan an rama thil thleng mek hi ngun takin a ngaihven a, a thlir reng tih a thupuangtu chuan a sawi.

Moscow-ah chuan Zirtawpni zan atang khan an hmun pawimawhte chu khauh lehzuala venhimna pek a ni a, sorkar hmun leh transport facility te pawh a tel niin sorkar news agency TASS chuan a tar lang.

Lipetsk region goverbor pawhin mi chengte chu ram chhim lam zin rih lo turin a ngen.

Lipetsk hi Ukraine nen an inrina atanga hmarchhak lam km 280 bawr vela awm a ni a, Rostov atangin hmar lam km 500 vela hla a ni.

Telegram-ah Igor Artamonov chuan an region-ah venhimna khauh taka kalpui thar a ni tih a sawi a, a bikin hmun pawimawh, beih remchang angte chu ven nasat zual a ni tih a sawi.

Zirtawpni zan tlai tawh taka Ukrainian Defence Ministry-in Twitter-ah, “Ngun takin kan thlir mek zel,” tiin a sawi.

White House pawhin a ngaihvenin a ngaichang reng a, a tul dan azirin US thawhpuite nen an inrawn zel dawn tih a sawi.

Ukraine-a Russian sipaite hotu ni thin, Prigozhin-a pawhin a fak thin, Gen Sergei Surovikin chuan Wagner group sipaite chu hnungtawlh ngei turin a ti bawk.