Ukraine an run vangin Russian GP thulh dawn

Russia chuan an ram atanga indang an thenawm Ukraine an run vangin khawvel pumin an dem mek a, an ram chhungah ngei pawh Ukraine an run duhlohna lan tirin mipui an pungkhawm thin a ni. Russia ram president Vladimir Putin chuan Ukraine laka indo a puan hnuah Russia chuan sipai chakna hmangin a ram thenawm Ukraine chu nasa takin a bei zui a, hei hian infiamna khawvel nghawngin an rama Champions League khelh tur chu ram dangah sawn a ni a, Russian Formula 1 Grand Prix tlan tur pawh thulh a ni bawk.

Kumin  September ni 25-a Sochi hmuna tlan tur Russian Formula 1 Grand Prix chu Russia ramin an thenawm ram Ukraine a run vangin thulh a ni. He thu tlukna hi F1 thu neitute chuan puangin an stakeholder te thu khawm chuan,"Boruak thlirin tun dinhmunah kumin chhung chuan Russian Grand Prix hi neih a rem dawn lo a ni. He thil thleng hian min thawng a, kan hnual hle a, beiseina sang tak nei chungin he thu tlukna hi kan siam a ni," an ti. 

Formula1 drivers ten eng nge an sawi?

Pierre Gasly (Alpha Tauri): "He thu tlukna hian min tilawm takzet a ni. Indona kara leng mek an nih vangin thil tha leh dik tak an tiin ka hria. Ram leh ram indona thleng hmuh hian min ti lungngai takzet zet a ni. Russia hi ram ropui tak a ni tih kan hria. He indona hi a fair lo hlein ka hria, Ukraine rama ka hmelhriat hnaite vangin mimal tak pawhin hrehawm ka ti hle a ni,"

Max Verstappen:“Ram pahnih indo lai mek an ni a, an rama intlansiakna lo neih chu thil dik a ni lovang,”

Lando Norris (McLaren): "Formula 1 tana thu tlukna tha tak niin ka hria. Russia hi tunah tak hi chuan ka ram tlawh chak loh tak a ni. Pawisawilo nunau ten nasa takin an tuar dawn a, thil thleng hian min ti hrehawm takzet a ni," 

Alexander Albon (Williams): "Kawng dik niin ka hria, a lungngai thlak a ni. Racing aia lian thil buipui tur an ngah,"

Sebastian Vettel: “Russian GP hi an kaltlangpui a nih chuan ka kal lovang, an rama intlansiakna neih hi thil dik a ni lo. Chhan leh vang ho tak tak avangin mi pawisawi lo nunna chan an awm hi pawi ka ti,"

Paris lamah Champions League final 

Europe khawmualpuia club competition ngaihhlut ber Champions League final May ni 28-a St Petersburg khawpuia khelh tura ruahmanna awm chu, Russia-in an ram thenawm a run luih vangin Paris khawpui lamah sawn a ni. Hetih lai hian International Olympic Committee lam pawhin International sports federations ten Russia emaw Belarus sport event neih tura a ruahman reng reng a sawn hla emaw a cancel tur a ni tiin thuchhuah a siam ve bawk.

UEFA president Aleksander Ceferin chuan Zirtawpni zan khan meeting dang lam leh hmanhmawh thlak tak ko nghalin UCL final khelhna hmun sawn chungchang an sawi ho va. He meeting-ah hian Europe-a football thuneitu sang ber UEFA chuan tun season-a Champions League final khelhna hmun tura a lo ruat lawk tawh St Petersburg chu thlak danglamin Paris khawpui-a Stade de France-ah an nghat dawn. 

Hun harsa an tawh laia ruahmanna lo siampuitu French President Emmanuel Macron-a chungah UEFA chu an lawm hle a, an harsatna hrethiam tu Macron-a chungah lawmthu an sawi.

Thil thleng dang

Manchester City lama Ukraine defender Oleksandr Zinchenko chuan an ram tan a ding tlat tih lan tirin Manchester city centre-a indo duh lo te pungkhawm chu zawm ve. West Ham player Ukraine winger Andriy Yarmolenko pawh an ram run a nih vang hian an club chuan chawlh a pe. 

Manchester United chuan Russia national airline Aeroflot nena an thawh dunna an chhu chat nghal bawk. 

Uefa chuan Russian gas company Gazprom nena sponsorship deal an neih mek £30million chu tih tawp an tum mek.  

Russian tennis star Daniil Medvedev-a pawhin an ramin indo a puang mai chu hriatthiam har a ti hle a, khawvel-a remna palai hnathawh a duh thu a sawi. 

Unau boxer ropui 
Klitchko te an ram tan

Heavyweight boxing-a rorel tawh thintu Ukrainian unau pahnih Vitaly Klitschko leh Wladimir Klitschko te chuan Russia laka an ram Ukraine humhim turin indonaa tel ve an tum thu an sawi. 

Indopui pahnihna hnua Europe khawmualpui a indona nasa ber thleng mekah hian boxing ring chhunga huasenna lan tir tawh thin heavyweight boxing champion lo ni tawh thin Klitschko te unau chuan indo tura chhuah ve an ril ruk. 

Sipai-ah pawh lo tang hrep tawh Vitaly leh  Wladimir te chuan an ram humhim tura a inpeih reng thu a sawiin an tan duhthlan tur dang a awm loh thu an sawi a ni. 

Ukrainian heavyweight champion lai Oleksandr Usyk pawh an ram Russia-in a run zan la la khan London atangin an ram Ukraine panin a thlawk haw ve nghal bawk. 

Anni aia ram lian run tawk mek nam huaisen Ukrainian te indona an hmachhawn mekah an zam lo hle.