Russian-ten Ukrainian khawpui, Kyiv an beih mekah lo dangtu an nei mek a. Ukrainian sipaiten hmun hrang hrangah an lo bei let tih an sawi.

Inrinni zing hma taka sipaiten Facebook-a an tar lanah army unit-in Russian sipaite chu khawpui chhunga kawngpui lun ber bulah an lo dang let.

Video a tihchhuah tharah President Volodymyr Zelensky chuan, “Kan ralthuam kan dah dawn lo va, kan ram kan hum dawn,” a ti.

Hetih lai hian khawpui lian dangah pawh inkahna a thleng nasa hle.

Interfax-Ukraine news agency-in a tar lan dan chuan Kyiv thuneitute chuan mipuite chu bomb laka himna hmun an siam (bomb shelter)-ah awm tur leh ina an awm a nih pawhin tukverh bula awm lo turin an ti.

Hetih lai hian National Security & Defence Council Secretary Oleksiy Danilov chuan Ukrainian news site Lb.ua hnenah an sipaiten khawpuia inbeihna thleng mekah ro an la rel zawk tih a sawi.

“Kan theih ang angin kan lo dang a. Sipaite leh mipuiten Kyiv hi an la thunun a ni,” a ti.

 A maha thla inlak (self-shot)-a video a siamah Zelensky chuan Kyiv-a sorkar hmunpui awmna, government district a fang kual a. Russia laka a sipaite inpe anga sawina chu a dik lohzia a tilang.

“Internet lamah thu dik lo ta thangin ka sipaite chu an ralthuam dah tur leh inthiar chhuak turin ka ti nia sawi a ni a. Hei tunah he hmunah hian ka awm a, kan ralthuam kan tung dawn lo va, kan ram kan hum dawn,” tiin Kyiv-a Gorodetsky House atangin a sawi.

Kyiv Mayor Vitali Klitschko chuan missile-in flat kah fuh a ni tih a sawi a, thla lak pawh Facebook-ah pho langin apartment pali vel a chhia.

Telegram-ah naupang pahnih telin mi 35-in Inrinni zing dar 6:00 (India-a India-a dar 9:30) thleng khan hliam an tuar niin a sawi.

“Khawpui chhungah Russian sipai an awm lo,” a ti a. Boruak atanga beihna dang a la awm theih avangin shelter-a la awm turin mipuite chu a ti bawk.

Inrinni tuk vek khan Ukrainian air force command chuan Kyiv chhimthlang lama Vasylkiv air base-ah inbeihna nasa tak a thleng niin an sawi a, Russian paratrooper-ten an bei niin a sawi.

Hmun dangah an indo thlawhna hmangin  Russian transport plane an kap thla niin a tar lang bawk a, finfiahna erawh a la awm rih lo.

Zelensky chuan Russian sipai zingah thi an tam tawh hle tih a sawi a, ‘hmelmate hian nasa takin an tuar a ni’ tiin a sawi a; mahse, hei pawh finfiahna a la awm thei rih lo.

Russian sipaiten Kyiv an hnaih mek zel lai hian Ukraine chuan khawthlang ramte chu rang zawka Moscow hrekna kalpui turin a ngen.

Hrek dan tura an duh zingah sumdawnna lama pawisa inthawn kualna, Swift pawh hmang thei lo tura tih an ngiat.