DOWNLOAD OUR APP

Read latest news on your phone
app-store

Russia-in Lviv-a thlawhna siam thatna hmun a kap

Mar 18, 2022

Russia chuan missile hmangin Ukraine khawthlang lama Lviv khawpui bul lawka awm, thlawhna siam thatna hmun (aircraft repair plant) chu a kap a. He khawpui hi indona tlanchhiatsan mi tam tak tlan luhna a ni. Russia-in Poland ramri bul lawk a kap ta hi mi thiamte chuan khawthlang ramte tihthaiha Ukrainian-te puitu tihhlauhthawn a tumna ni theiah an ngai.

Russia chuan missile hmangin Ukraine khawthlang lama Lviv khawpui bul lawka awm, thlawhna siam thatna hmun (aircraft repair plant) chu a kap a. He khawpui hi indona tlanchhiatsan mi tam tak tlan luhna a ni.

Khawpui laili atanga km 6 vel chauhva hla hi rikrum thila che chhuak chi lirthei eng emaw zatin a hmun hi an pan nghal a. Zirtawpni tukah khan thil puak ring tak tak vawi thum hriat a ni.

Tumah inhliam erawh an awm hriat a ni lo.

Lviv hi puih ngaite puina pek luhna kawngkapui ber a ni a, indona tlanchhiatsan mi sang tel luhna a ni bawk.

Ukraine khawthlang lam hi an ram hmun dangte aia indona thlen tlemna a ni a. Russia hian kil thum - hmar, khawchhak leh chhim atangin a rûn a, Lviv leh a bul hnai khaw dangte chu an la him angreng hle a ni.

Tun dinhmunah erawh thil a danglam leh ta a, Zirtawpni tuka missile-a kah a nih bakah hian Pathianni khan missile hmang vekin khawpui daia sipai training-na hmun pawh kah a lo ni tawh.

“Tuk tin air raid alarm a ri ziah a, vawiinah erawh beihna tak tak chu a lo thleng ta,” tiin kum 82 mi, Valentin Vovchenko chuan Lviv atang hian AFP news agency a hrilh a. “Kyiv-ah beih kan tawh avangin kan tlan lut a, hetah pawh min rawn bei leh tan ta,” a ti.

Mayor Andriy Sadovy pawhin military aircraft maintenance facility hi cruise missile hmanga kah ngei a nih thu a sawi.

A hmun hi tun dinhmunah hman a ni lo va, Danylo Halytskyi International Airport atanga hla lo tak a ni a. Sadovy-a chuan thlawhna tumhmun hi chu a him rih niin a sawi.

Ukraine air force chuan Black Sea atangin cruise missile paruk hmanga kah a ni a, pahnih chu anti-aircraft missile hmanga an lo kah thlak hman thu a sawi.

“Russian-te hian Ukrainian thlawhnate vansanga an chet theih lohna turin an hmunte an tum a ni,” tiin Royal United Services Institute (RUSI) think tank-a director thin, Prof Michael Clarke chuan BBC a hrilh.

Lviv hi Poland atang pawhin km 80 chauhva hla a ni a. Poland-ah hian Ukrainian maktaduai hnih chuangin himna zawngin an tlan lut tawh a, an chenna in a chhe nasa tawh hle a ni.

Prof Clarke chuan hetianga Russia-in ramri bul lawk a kap hi khawthlang ramte tihthaiha Ukrainian puitute tihhlauhthawn nana a tih a ni thei tih a sawi.

UK Armed Forces Minister James Heappey chuan Ukrainian-te hi Starstreak anti-aircraft missile system hman dan an zirtir mek a, he hmanrua hian an ramah an thlen thuai dawn tih a sawi bawk.

Share now