Russia chuan nizan khan Central Ukraine-ah bomb a tibuak leh a, mi 14 aia tlem lo an thi tih Ukrainian official te chuan an sawi. Bobm hi Dnipropetrovsk region-a puak a ni a, he lai hmun hi Europe-a nuclear power plant lian ber awmna a ni nghe nghe. 

Dnipropetrovsk Governor chuan thi zat hi an punchhoh theih thu a sawi a, hliam pawh eng emaw zat an awm tih a sawi. Thi zinga mi 13 te hi Dnipropetrovsk region-a Marhanets khua a mi te an ni a, Zaporizhzhia-ah mi pakhat a thi ve bawk. 

Zaporizhzhia nuclear power plant hi Russia thuhnuaiah a awm a, he lai hmun atang hian Russia sipaite hi an che na thei hle. Ukraine chuan he nuclear power plant hi Russia chuan a sipaite inkulhna hmun a tan a hmang tih a sawi a, he lai hmun atang hian Ukraine hmun hrang hrang an kap thin tih an tarlang. 

Zaporizhzhia nuclear power plant hi Russia chuan March thla khan a la tawh a, mahse tun thlengin Ukrainian technician te chuan an la enkawl thungi. He lai hmunah hian Russian sipai 500 vel an awm a, rocket launcher chu he lai hmun atang hian an kapchhuak thin tih Ukraine lam hian an sawi a ni.