DOWNLOAD OUR APP

Read latest news on your phone
app-store

Russian general kan thah belh leh : Zelensky

Mar 17, 2022

Ukrainian President Volodymyr Zelensky chuan an indo meknaah Russian general dang an that leh niin a sawi a. Interior ministry adviser chuan Maj Gen Oleg Mityaev-a thah a nih thu leh Azov Battalion-in an thah thu a sawi bawk a. Russia hian indonaah hian a general 20 vel a tir chhuak niin an hriat a ni a, Ukraine-in a sawi hi a dik a nih chuan a general tirh chhuah pangaa pakhat zel thi tawh ang an ni.

Ukrainian President Volodymyr Zelensky chuan an indo meknaah Russian general dang an thah leh niin a sawi.

Officer hming hi a sawi lo va; mahse, Ukrainian interior ministry adviser chuan Maj Gen Oleg Mityaev-a a nih thu leh Azov Battalion-in an thah thu a sawi.

Gen Mityaev-a hi Mariupol khawpui bul lawkah thah niin Ukrainian chanchinbute chuan an tarlang.

Ukraine-in a sawi hi a tak a nih chuan Russian general an thah palina a ni ta a; mahse, mi tam tak chuan indonaa ral hmatawngaah engvangin nge Russian sipaite hian an hotu liante an dah tih chu an zawhna a ni a, indona hmun tak taka an awm an ring meuh lo.

Mi thiamte chuan Russia-in a thenawm ram laka beihpui a thlak mekah hian a general 20 vel a tir chhuak niin an hria a. Ukraine-in an sawi hi a dik a nih chuan a general tirh chhuah pangaa pakhat zel thi tawh ang an ni.

Sipai hotu lian chân hi thil pawi tak a ni a, mi thiamte chuan an awm lohna tur hmun leh hunah an awm niin an ngai a, hetih rual hian Ukraine hian Russian officer lawkte hi a tum bik hrim hrim nia ngaih a ni bawk.

“Tihpalh ni theiin ka ngai lo. Pakhat chu a thleng palh thei a; mahse, heti zat hi chu tum bika thahna a ni,” tiin Georgetown University-a mi, Rita Konaev chuan BBC a hrilh.

President Zelensky-a kaihhruai mi tlem zinga tel pakhat chuan Ukraine hian military intelligence team neiin heng mite hian Russian officer class te hnu chhuiin an bitum niin Wall Street Journal hnenah a sawi bawk.

“General lawk, pilot leh artillery commander-te an zawng kual a ni,” a ti.

Ukraine hian Russia nena an indo meknaah hian sipai an neih tlem zawk avangin an tan an hmelma hotu liante thah chu a hlawk ber niin Konaev-i chuan a sawi bawk.

Ukraine hian a hmain 29th Combined Army Commander Gen Andrei Kolesnikov; 41st Combined Army Chief of Staff Vitaly Gerasimov leh 41st Combined Army Deputy Commander Andrey Sukhovetsky te an lo that tawh niin an insawi.

Share now