July 19, 2023; Aizawl Sahuana sava dah bo nia sawi chu Environment & Forest department chuan police punin zawn mek a ni a, vawiin thlengin a rutu man a la ni lo.

Media hrang hrang a tarlan tawh angin, July ni 1 zana dan phal loha ramdang atanga Mizorama tawlhluh, a tawlhtute kut atanga man sava (exotic birds) chi hnih – Hyacinth Macaw leh Vulturine Parrot chu Aizawl Sahuanah hian dahluh a ni a, heng sava chihnih bakah Sahuana awmsa Rufous Hornbill nen July 4 zing khan a bo tih hriat a ni a, rukchhuah a nih rin a ni.

Hemi chungchangah hian Sairang Police Station-ah FIR thehluh a ni a. Dan phal loha chawkluh sava man hi Sahuan chhunga mi nawlpui tlawh phak loh leh an quarantine-na hmunah an dah hmasa thin a, tuna bo ta tam zawk pawh hemi hmun atanga bo hi niin, a vaiin 11 an ni.

Sahuan enkawltute chuan tun dinhmunah pawikhawihtu man an la awm lo tih ZALEN an hrilh a, hnuchhui hna thawktu police lam thu an ngaichang mek tih an sawi.