Aizawl: Nimin khan Sakawrdai Community Health Centre chuan damdawi in fai leh tha lawmman a lak an lawm a, School Education Minister Lalchhandama Ralte-in a hmanpui.

School Education Minister chuan Sakawrdai CHC-in damdawi in fai leh tha lawmman a la chu a lawmpui thu leh damdawi in chhunga Doctor leh thawktute a chhuan thu a sawi a. Minister chuan inthlan hma atanga a aupui thin chu zirna tha, hriselna leh kawngpui tha a ni tih sawiin chung zinga mi hriselna lamah Sakawrdai CHC in damdawi in tha lawmman a dawng thei chu lawmawm a tih thu leh sorkarin hma a lak chhoh zelnaah thawhhona tha an neih zel a beisei tih a sawi.

Sakawrdai Community Health Centre lawmman lak te hi Kayakalp (Damdawi in fai leh tha) 2019-20 lawmman pakhatna, NHM Overall Performance Award (PHC/CHC/SDH) 2019-20 lawmman pakhatna, Best Performing CHC Under Reproductive & Child Health (RHC) leh National Vector Borne Disease Control Programme lawmman pahnihna, Overall Performance Award (Main Centre, Sakawrdai) lawmman pathumna te a ni. Sakawrdai CHC lawmman lak lawmna hi Sakawrdai CHC kawtzawlah hman a ni a, Sakawrdai CHC ah hian Doctor 3, Nurse 7 an thawk a, khum 24 an nei a ni.