ZALEN December 30, 2025: Mizoram sawrkar Tourism Department in kum tina tih tawh tura an rel angin naktuk tlai hian 'Sakawrhmuituai Sunset View' huaihawt a ni dawn a, hemi avangin hian Sakawrhmuituai kawng (Aizawl to Kawnpui via Sihphir) chu chhun 12 atanga tlai 6 pm thleng block a ni dawn.

Tourism Department buatsaih ‘Sakawrhmuituai sunset view’ neih turah Mipui pungkhawm tam tura beisei a nih avangin Health & Family Welfare Department atangin medical duty leh police atangin security duty awm tura ruahman a ni. Traffic chungchangah pawh SP, Traffic leh SP, Kolasib te nen tangkawpa ruahmanna mumal tak siam a ni.

Sakawrhmuituai Sunset programme pual hian security ah volunteer 130 vel an duty dawn a, traffic duty ah mi 70 vel leh, chetsualna thlen thulha che chhuak thei tur response team atan mi 20 vel ruat a training pek an ni.