Manipur police chuan tun hnaia hmeichhe pahnih saruaka khawlaia chaih phar thu kal zelah mi pakhat an man belh leh a. Hetih lai hian mi man hmasak ber chenna in chu halsak a ni.

Video darh nasa taka inhnamhnawih dangte pawh ngawrh taka zawn zui zel an ni a, Chief Minister N Biren Singh chuan amah ngeiin zawn chhuah hna thawh hi a vil niin a sawi.

State sorkar chuan rinhlelhte tawmna hmun hrang hrang dap a ni tih a sawi a, boruak a la tang hle niin an sawi a. Hmun hrang hrangah sit-in protest demonstration neih a ni bawk.

Police-in mi an man belh leh hma hian mi pali man an lo ni tawh a, an zingah hian a rinhlelh kai ber, Huirem Herodas Meitei pawh a tel a, ani hi Petchi khuaa hmeichhiaten an in an halsak bawk.

Sorkar chuan phai leh tlangram district hrang hrangah checkpoint 126 siamin police-in dan bawhchhia mi 413 an hreng tawh tih an sawi.

Sorkar hian mipuite chu police leh venhim hna thawktu dangte kut atanga ralthuam an rukte pe kir turin a ngen bawk.

Biren Singh hian Zirtawpni khan hmeichhe pahnih saruaka khawlaia kalpui lai video darh chu a dem thu a lo sawi tawh.

Chief minister hian a bial, Heingang-a thil thleng demna lantirnaah pawh a telpui bawk.

Manipur-a chi leh chi intihbuainaa Kuki hmeichhe pahnih saruaka khawlaia kalpuiah hian Assam Chief Minister Himanta Biswa Sarma chu Zirtawpni khan a tawng chhuak a, a darh hunah politics a awm a rin thu a sawi.

Video a darh kha Nilaini a ni a, hei hi parliament fur thutkhawm tan hma ni chiah a ni a, tihput hun phenah hian politics a inrawlh a ring.

Pawngsual chu BJP rorelna, Manipur leh hmarchhak hmun dang aiin eptute rorelna state thenkhat - West Bengal, Rajasthan leh Chhattisgarh-ah a tam daih zawk niin a sawi.

“He thil hi rei taka mi a ni tawh a, video pawh a awm a. Parliament thutkhawm hma chiah niin a darh ta a. A phenah hian politics chu a inrawlh chiang a nih hmel,” a ti.