India-a Supreme Court chuan hmarchhak state, Manipur-a chi leh chi inkara tharum thawhna thleng kaihhnawiha petition a dawn hrang hrangte a ngaihtuah tan dawn a. Heng zingah saruaka hmeichhe pahnih khawlaia kalpuiten an ngenna pawh a tel.

Nasa taka video darh leh khawvelin mak a tih leh a dem rawnah hian hmeichhiate hi saruakin khawlaiah kalpui an ni a, mipa thahnem takin hualin nawmnah takin an ti tih a lang.

He thil hi Manipur-a buaina a chhuah tir, May thla tira thleng tawh kha a ni a; mahse, tun thla tawpa a video a darh hnua hriat lar chauh a ni.

Hmeichhe pahnihten petition an thehluhah hian dik taka an chunga thil thleng relsak tur leh an nihna (identity) humsak tura ngenna a tel.

Sorkar laipui atang pawhin saruak video darh chungchangah hian petition a thehlut ve tho va. Supreme Court hnenah hian he thubuai hi Manipur chhung ni lova ngaihtuah tur leh thla ruk chhunga chhui fel vek tura ngenna a ni.

Myanmar nena inrinaa awm, Manipur-ah hian a mi cheng tam ber, Meitei leh a tlem zawk, Kuki tribal inkara thla thum dawn buaina chhuak tawhah hian mi 130 vel an thi tawh a, mi sang tel baihvaiin an awm mek.

Saruak video darha lang hmeichhe pahnih hi Kuki an ni a, a hualtu mipate hi Meitei an ni a. Thil thlen tuk lawkah hian police hnenah pawh thlen a ni a, hmeichhe pakhat zawk hi pawngsual rawn a ni bawk.

Police chuan mi pasarih an man tawh a; mahse, an mi man hmasak ber hi thil thlen atanga thla hnih leh a chanve vel, video a darh hnu, July 20 chauh kha a ni.

Eptu party hruaitute chuan Prime Minister Narendra Modi-a kaihhruai BJP sorkar chu Manipur buainaah hian hma a la tawk lo niin an puh a. Hmarchhak state-ah hian saffron party thovin thuneihna an chang a ni.

Modi-a hian Manipur buai meknaah hian saruak video darh  ta chungchangah chauh aw-ka a la nei a. He thil thleng hian ram a tihzah thu leh ti sualtute chu tumah zuah an nih loh tur thu a sawi a. Hetih lai hian he state hi tun thlengin a la tlawh lo.

Eptu hruaitute chuan parliament-ah Modi-a sorkar rintawk lohna pawh an pu lut hial a, hei hi buaina chungchang a sawi chhuah theih nana nawr nana an tih a ni.

Kartawpah khan eptu tangruala MP 21 chuan Manipur hi an tlawh bawk a. State governor hnena memorandum an thehluhah ‘dan leh thupek kenkawhna a chhe vek’ tih ziakin relief camp-te dinhmun pawh a chhe hle niin an tar lang.

Eptu MP-te hian sorkar laipui leh state sorkar chuan hnam hniha mipuite a hum lo zo niin an puh a. Modi-a hian ‘zak miah lovin a ngai pawimawh lo’ niin an sawi.

Hetih lai hian Union Minister Anurag Thakur chuan Manipur tlawh hi a sawisel a, ‘politics khelh nana zin’ a tihsak a. Buaina a chhuah tan atang khan Manipur chungchang hi sawi an inpeih reng niin a sawi a, eptute chu ‘an tlanchhe zawk’ niin a sawi.

Kar hmasa khan Home Minister Amit Shah chuan sorkar laipui hnuaia police-in video kha an chhui dawn tih a puang tawh a. Kuki leh Meitei te chu an palai hnathawktuten dawrin inbiakna pawh an nei fo tawh niin a sawi bawk.