India ram pumah Diwali lawma halpuah leh halmawi thawm a rik chuah chuah laiin, Erode district, Tamil Nadu-a tlingtlang khaw pasarihte chuan kût pualin êng chauh an chhi a, an khaw bul lawka sava humhalhna hmuna chengte an tihralkhelh loh nan eng ri dang mah an siam duh lo.

Heng khuate hi Erode atanga km 10 vela hla, sava humhalhna hmun, Vadamugam Vellode chheh vela awmte an ni.

Sanctuary-ah hian October leh January inkarah hian tual chhung sava bakah sava pem chi kalkhawmin no an nei a, an awp thin hun lai, an inthlahpun lai a ni.

India-a kût pawimawi ber pakhat, Hindu kût lian ber ni bawk, Diwali hi October emaw, November emaw a ni thin a. Hetih hun lai hian sava chhungkaw 900 chuang zet sanctuary-ah an awm thin a, a chhehvela chengte hian an tihhlauh loh nan halpuah chi hrim hrim an hal duh ta lo a ni.

Sava humhalh nan hian an sakhaw kût ropui ber lai ni mah se kum 22 zet puak thei leh bengchheng siam lovin an lo lawm tawh a ni.

Khaw mite chuan Diwali pual hian an fate chu kawr thar an leisak a, halmawi lam chi chauh hal an ti a, puak thei an hmang tel ngai lo.

Kuminah pawh Sellappampalayam, Vadamugam Vellode, Semmandampalayam, Karukkankattu Valasu, Pungampadi leh khaw dang pahniha chengte chuan bengchheng awm lo Diwali hi an kalpui leh a ni.

Anmahni duhthlanna ngeia bengchheng siam lo Diwali an lawm chung hian sava sang rualte chu him leh nuam ti takin an awm theih phah a, kumina kût lawm vang lai, Inrinni leh Pathianniah pawh sava tana tit phahna tur engmah thawm a awm lo a ni.