SAWHKHAWK of the day Tunlaia kan rama kan titi ber chu gas harsa leh thim thuah hnih hi a ni mai lo maw? Kei chuan thim thuah hnih an tih aiin gas harsa hi ka vei zawk a ni. Naupang sikul kal hma a ngai si, hetih laia gas nghei hlau reng renga hun hman chhungkhat nu hian a hahthlakzia chu kan hre chiang a ni. Nghei ila man tova leina kan nei dawn lo tih kan inhre chiang bawk si a, retheih leh gas nghei chu a inrem lo tak zet a ni. Sorkarin a phur dawn tih thawm ka lo hria a, ka lawmna hi a sang hle a ni. Hmana kan kawtkaia gas min zawrha an au chuah chuah ang kha han ni leh se chhungkhat nu hi chu kan lawm ber hian ka ring a ni. Engpawh ni se, sorkar nghak phawt mai ang aw...!! - Chhungkhat nu ber Kan khawpui kawngpui hi an sawi fo angin a tawt tih kan hria a, lirthei pawh an intlanchhawk a. Chutih laia ka rilrua lo lang chu, ngatinge private zawk hi an intlanchhawk loh tih hi a ni. Chhungkaw chawm nana hmanga, eizawn nana lirthei khalhtute kan han indin chhawrtir daih hi a mak angreng. Mi mal lirthei hi chu mamawhna chu a sang viau a ni thei a; mahse, eizawngho ai hi chuan an mamawhna hi a sang lo zawk hian ka ring. Kan hotu lian ber thleng hian intlanchhawk ta zawk ila, a ziaawm sawt bawk hian ka ring a ni. - 9436360899 Kar hmasaa October thlaa ruah a sur ngai em ni tih lam hawia thu rawn chhuahtu kha a kum a la naupang deuh nge thil a chhinchhiah tha peih loh aw...? Nikum maiah pawh khan October 14 thleng ruah a sur a, a tuk atangin khua a tha a, kuminah pawh chutiang chiah chuan October 15 atangin khua a tha ta a nih hi. Nakinah, kum tawp dawn retah ‘pawl delh ruah’ an tih chu a zur leh ngei a rinawm a, chu chuan thlasik hi a tithlasik zual ang a, a vawt tak tak a intan chiah ang. Mizote hunbi chhiar dan a ni e, ka lawm e. - Mapuia Kan zoram mipui tam tak hian tunlaia Pathian thuhriltu thenkhat leh tuten emaw thim an sawi hi kan titi luih luih ni berin ka hria a. Ka han ngaihtuah hian, awiha awih loh chi-ah pawh ka ngai chiah lo. An sawi ang zawng zawng hi a thleng kher lo mai thei a; mahse, kan khawvel awm dan han thlira Bible-a hun hnuhnunga thil thleng tur inziakte han en chet chet hian, kan khawvel hi chu a hmawr tawh a, Mizoram chauh ni lo, a khawvel pum pui hian tawp lam chu a hnaih tawhin ka hria a, inrin hi chu a ngai ka lo ti ve mai mai a ni. - 8794686442 Chanchinbu lamah gas an phur tan dawn tih han chhiar chu a va han nuam ve aw... an rawn sawi fo tawh angin keini mi rethei tan phei hi chuan a man tova han lei hi a harsa em em mai si a. Gas neih loh leh tui neih loh hi chuan retheite hi kan retheih hmel zual bik hliah hliah hian a hret mai. - Mawimawii nu gas kan han harsat tak tak chuan VIP min tihte chu kan au chuah chuah mai lawm le! Kan thunun phak loh thil avanga buai pawh hi kan ang lo va, kan thunun phak si, kan tum loh avanga kan buaina mai mai ni hian ka hria a, sorkarin hma a han la tawh tur pawh hi ka lawm a, chutih rual chuan an che chhuak tlat mah mah hian ka lo hre ve, an ram mipuite gas tamin kan tam a nih tawh hi, che thuai thuai teh se. - 9436360899 Thim thuah hnih leh hremna lo thleng tur a lar hle a. Kei chu thim thuah hnih an sawi fo hi Bible-ah ka hmu ve miah lo mai a; chuvangin, ka lo awih lo ve tawp mai a ni. Ringtute chuan kan Pathian thu dawn leh hriatte, kan nun kaihruaitu atante hian kan Bible hi kan hmang tur niin ka ngai hmiah mai a ni. Kan khawvel hun hi chu a hmawr tawh ang; mahse, a thim thuah hnih hlauh zawnga khawsak erawh a tulin ka hre lo a ni. - Apuii